Xəzər Universitetində “Qanlı gecədən işıqlı gələcəyə” mövzusunda tədbir keçirilmişdir
Bakı, 19 yanvar (AZƏRTAC). Yanvarın 19-da Xəzər Universiteti Milli QHT Forumu ilə birgə 20 Yanvar faciəsinin 22-ci ildönümünə həsr olunmuş “Qanlı gecədən işıqlı gələcəyə” mövzusunda tədbir keçirmişdir.
AZƏRTAC xəbər verir ki, universitetin müəllim və tələbələrinin iştirak etdikləri tədbirdə Azərbaycanın Dövlət Himni səsləndirilmiş, faciə qurbanlarının xatirəsi bir dəqiqəlik sükutla yad edilmişdir.
Xəzər Universitetinin ictimai əlaqələr və media üzrə direktoru Əlövsət Əmirbəyli və Milli QHT Forumunun sədri Rauf Zeyni keçmiş sovet rəhbərliyinin və onların Bakıdakı havadarlarının 1990-cı il yanvarın 19-dan 20-nə keçən gecə ölkəmizdə törətdikləri faciənin dəhşətlərindən danışmış, tariximizə qanla yazılan bu hadisənin xalqımızın yaddaşından heç zaman silinməyəcəyini söyləmişlər.
Tədbirdə qətliamdan bəhs edən videoçarx nümayiş etdirilmiş, ədəbi-bədii kompozisiya təqdim olunmuşdur.
Bölmənin digər xəbərləri
