Xocalı faciəsi Azərbaycan xalqının qəlbində sağalmayan iz qoymuşdur
Bakı, 21 fevral (AZƏRTAC). Fevralın 21-də Beynəlxalq Mətbuat Mərkəzində “Qadın və Uşaqların Problemlərinin Araşdırılması” İctimai Birliyinin təşkilatçılığı ilə Xocalı soyqırımı qurbanlarının xatirəsini anma tədbiri keçirilmişdir.
AZƏRTAC xəbər verir ki, tədbirdə İctimai Birliyin rəhbəri Kəmalə Əliyeva Xocalı faciəsinin müasir tariximizdə müstəqilliyimizə qarşı yönəldilmiş terror aktı olduğunu bildirmişdir. Qeyd etmişdir bu, eyni zamanda ermənilərin əsrlər boyu xalqımıza qarşı apardıqları düşmənçilik siyasətinin bariz nümunəsidir.
Xocalı faciəsinin Azərbaycan xalqının qəlbində sağalmayan iz qoyduğunu vurğulayan tədbir iştirakçıları faciənin tarixinə bir daha nəzər salmışlar. Bildirilmişdir ki, 1992-ci il fevralın 25-dən 26-na keçən gecə ermənilər Xocalıda 106-sı qadın, 63-ü uşaq olmaqla 613 dinc sakini xüsusi amansızlıqla qətlə yetirmişlər. Bu faciə nəticəsində 8 ailə tamamilə məhv edilmiş, 25 uşaq hər iki valideynini, 130 uşaq isə valideynlərindən birini itirmişdir.
Qeyd edilmişdir ki, terror və təcavüz Ermənistanın dövlət siyasətinin əsasıdır. Özlərini müasir, sivil və demokrat sayan dövlətlər isə təəssüf ki, bu terror əməllərinə göz yumur, bütövlükdə insanlığa qarşı yönəlmiş Xocalı soyqırımını tanımaq istəmirlər. Faciənin səbəbləri dərindən araşdırılmalı, bu soyqırımın törədilməsində günahı olan şəxslər müəyyənləşdirilməli və canilər cəzalandırılmalıdır.
Bölmənin digər xəbərləri
