Xocalı faciəsi ermənilərin mənfur xislətini bütün dünyaya göstərdi
Bakı, 26 fevral, AZƏRTAC
Fevralın 25-dən 26-na keçən gecə yaddaşıma əbədi həkk olub. Xocalı həmin gecə misli görünməyən müsibət, dəhşət yaşadı. Evlərə-eşiklərə od vuruldu, şəhər yerlə-yeksan oldu. Düşmən qocaya, xəstəyə, qadına aman vermədi. Mən ailəmlə birlikdə həmin gecə ermənilərin törətdikləri vəhşiliklərin şahidi oldum. O acı xatirələr hər gün gözümün qarşısında canlanır. Ermənilər uşaqları xüsusi qəddarlıqla qətlə yetirdilər. Qız-gəlinləri əsir aldılar. Ayağı yalın, başı açıq halda meşələrə, dağlara üz tutanların çoxu yolda dondu, qar uçqunlarına düşdü. Həmin gecə üzləşdiyimiz müsibətləri dilə gətirməklə bitməz.
Bu sözləri AZƏRTAC-a müsahibəsində “Ana harayı” abidəsini ziyarət edən Xocalı şəhər sakini Teyyub Məmmədov deyib.
“Ermənilərin törətdikləri vəhşilikləri heç nə ilə müqayisə etmək mümkün deyil. Xocalı faciəsi özlərini hər yerdə “məzlum, yazıq, türklərin təqiblərinə məruz qalan bir xalq” kimi təqdim edən ermənilərin xislətini, iç üzünü açıb bütün dünyaya göstərdi. Bu faciə xalqımızın iradəsini, döyüş əzmini sındırmadı. Vətənimizin fədakar oğulları hər qarış torpağımızın müdafiəsi üçün qanlarını tökdülər. Xalqımızın mübarizə əzmi qırılmadı. Əminəm ki, Azərbaycan Prezidenti, Ali Baş Komandan İlham Əliyevin rəhbərliyi ilə biz torpaqlarımıza qayıdacağıq. Şəhidlərimizi Xocalı torpağında yad edəcəyik!”, - deyə Teyyub Məmmədov bildirib.
Bölmənin digər xəbərləri
