XOCALI FACİƏSİ QURBANLARININ XATİRƏSİ YAD EDİLİR

21.02.2004 [13:40]
Çap et
A⁺ A^-

AZƏRTAC-ın müxbiri xəbər verir ki, 1200 nəfərdən çox xocalılının məskunlaşdığı Bərdə rayonunda on iki il əvvəl, fevralın 25-dən 26-na keçən gecə baş vermiş faciənin ildönümü ilə bağlı xatirə mərasimləri keçirilir, videofilmlər, ədəbi-bədii kompozisiyalar göstərilir.

Məlum olduğu kimi, erməni-rus ordu birləşmələri Xocalı şəhərini yerlə-yeksan etmişlər. Bu zaman 613 nəfər dinc sakin qətlə yetirilmiş, 56 nəfər diri-diri yandırılmış, 112 nəfər itkin düşmüş, 1275 nəfər əsir alınmış, 6 ailə tamamilə məhv edilmişdir. Öldürülənlərin 83 nəfəri uşaq, 106 nəfəri qadın idi.

Bərdə Rayon İcra Hakimiyyətinin başçısı Xocalı soyqırımı ilə əlaqədar xüsusi sərəncam imzalamışdır. Sərəncama əsasən, idarə və təşkilatlarda, mədəni-maarif, səhiyyə müəssisələrində faciəyə həsr olunmuş xatirə gecələri, matəm mitinqləri, görüşlər, disputlar keçiriləcək, bütün ümumtəhsil məktəblərində həmin gün ilk dərs Xocalı faciəsinə həsr olunacaqdır. Milli İdeologiya Mərkəzində, Dövlət İdarəetmə Kollecində, peşə litseyində soyqırım şahidlərinin gənclərlə görüşü keçiriləcəkdir.

Hər il olduğu kimi, bu il də ümumrayon matəm mitinqi keçiriləcək, şəhidlərin ruhuna dualar oxunacaq, ehsanlar veriləcəkdir.