Xocalı faciəsinin 20-ci ildönümü Ağcabədidə silsilə tədbirlərlə qeyd edilmişdir
Ağcabədi, 24 fevral (AZƏRTAC). Xocalı faciəsinin 20-ci ildönümü Ağcabədi rayonunda silsilə tədbirlərlə qeyd edilmişdir.
Bütün müəssisə və təşkilatlarda, təhsil müəssisələrində, əmək kollektivlərində yığıncaqlar keçirilmiş, sərgi və guşələr təşkil olunmuş, faciə qurbanlarının xatirəsi anılmışdır.
Rayonun təhsil işçiləri, Azərbaycan Müəllimlər İnstitutu Ağcabədi filialının və pedoqoji kollecin tələbələri, ümumtəhsil məktəblərinin şagirdləri Şəhidlər xiyabanında Azərbaycanın ərazi bütövlüyü uğrunda canından keçmiş Vətən övladlarının xatirəsini ehtiramla yad etmiş, məzarları üstünə tər çiçəklər düzmüşlər.
Soyqırımının ildönümü münasibətilə Azərbaycan Müəllimlər İnstitutunun Ağcabədi filialında keçirilmiş tədbirdə filialın direktoru, professor Xaqani Məmmədov, müəllim və tələbələr çıxış edərək qanlı faciə barədə danışmış, Xocalıda törədilənləri bəşəriyyətə qarşı ən amansız cinayət adlandırmışlar.
Ağcabədi Pedaqoji Kollecində keçirilən mərasimdə rayon icra hakimiyyəti başçısının müavini Əbülfət Tapdıqov, texnikumun müəllim və tələbələri, Xocalıdan olan məcburi köçkünlər çıxış edərək erməni millətçiləri tərəfindən xalqımızın başına gətirilən müsibətlər, 1992-ci il fevralın 25-dən 26-na keçən gecə Xocalı şəhərində törətdilən qırğının acı nəticələrindən bəhs etmişlər. Tədbirdə tələbələrin iştirakı ilə ədəbi-bədii kompozisiya nümayiş edilmişdir.
Rayon icra hakimiyyəti tərəfindən Ağcabədi rayonunun ərazisində yaşayan Xocalıdan olan məcburi köçkün ailələrinə ərzaq yardımı edilmişdir.
Bölmənin digər xəbərləri
