XOCALI FACİƏSİNİN İLDÖNÜMÜNÜ QAZAXISTAN VƏ QIRĞIZISTANDAKI SOYDAŞLARIMIZ DA QEYD EDƏCƏKLƏR
Xarici Ölkələrdə Yaşayan Azərbaycanlılarla İş üzrə Dövlət Komitəsindən AZƏRTAC-a bildirmişlər ki, fevralın 26-da Almatı şəhərində yeni tikilmiş məsciddə “Turan” Azərbaycan ictimai-mədəni cəmiyyətlərinin konqresi tərəfindən soydaşlarımızın iştirakı ilə Xocalı faciəsinin ildönümü qeyd olunacaqdır. Ermənistan-Azərbaycan, Dağlıq Qarabağ münaqişəsinin ədalətli həllinə beynəlxalq ictimaiyyətin diqqətinin artırılmasına nail olmaq məqsədi ilə tədbirə Qazaxıstanda yaşayan digər xalqları təmsil edən cəmiyyətlərin nümayəndələri də dəvət olunmuşlar.
Astana şəhərindəki “Xəzər” ictimai birliyi və Karaqanda şəhərindəki “Namus” Azərbaycan Mədəniyyət Mərkəzi tərəfindən də Xocalı faciəsi qurbanlarının xatirəsi yad olunacaq, şəhidlərimizin ruhuna dualar oxunacaq, ehsan veriləcəkdir.
Xocalı faciəsinin ildönümü Qırğızıstan Respublikasındakı soydaşlarımız tərəfindən də qeyd ediləcəkdir. Bişkek şəhərindəki “Azəri” Assosiasiyası tərəfindən soydaşlarımızın yardımı ilə tikilən və bir neçə gün əvvəl istifadəyə verilən yeni məscidin binasında fevralın 26-da anma mərasimi keçiriləcəkdir. Tədbirdə Ermənistan-Azərbaycan münaqişəsinin tarixi köklərindən danışılacaq, şəhidlərimizin ruhuna dualar oxunacaq, ehsan veriləcəkdir.
Bölmənin digər xəbərləri
