Xocalı prospektindəki abidə kompleksində yenidənqurma işləri aparılır
Bakı, 22 fevral (AZƏRTAC). Xocalı soyqırımının 19-cu ildönümü ilə əlaqədar Xətai rayon İcra hakimiyyəti tərəfindən tədbirlər planı hazırlanmışdır. Plana uyğun olaraq, faciə qurbanlarının xatirəsini anma mərasiminin keçiriləcəyi Xocalı parkında görülən abadlıq işləri artıq yekunlaşmaq üzrədir.
AZƏRTAC xəbər verir ki, Xocalı prospektində 1993-cü ildə inşa qoyulmuş “Vətən harayı” abidə kompleksində yenidənqurma işləri aparılır. Belə ki parkda quraşdırılan ana heykəlinin postamenti 3 metr qaldırılmış və qara qranitdən yenidən qurulmuşdur. Kompleksin yerləşdiyi ərazinin döşəməsinə qara və qırmızı qranit döşənmişdir. Faciə zamanı qətlə yetirilənlərin adları lövhənin üzərinə həkk olunmuşdur. Abidənin aşağı hissəsində əklil, sağ və sol tərəflərində Azərbaycan və ingilis dillərində faciə haqqında qısa məlumat yerləşdirilmişdir.
Parkın ərazisində çoxsaylı oturacaqlar, xüsusi işıqlandırma sistemi quraşdırılmışdır. Ərazidə əsasən xarici ölkələrdən gətirilən 70 minə yaxın dekorativ ağac və gül kolları əkilmişdir.
Bölmənin digər xəbərləri
