Xocalı soyqırımı qan yaddaşımızda əbədi yaşayacaqdır
Ağcabədi, 23 fevral (AZƏRTAC). Azərbaycan Müəllimlər İnstitutunun Ağcabədi filialında Xocalı soyqırımının 20-ci ildönümü münasibətilə tədbir keçirilmişdir.
AZƏRTAC xəbər verir ki, tədbir iştirakçıları əvvəlcə Şəhidlər xiyabanında Azərbaycanın ərazi bütövlüyü uğrunda canından keçmiş Vətən övladlarının xatirəsini ehtiramla yad etmiş, məzarları üstünə tər çiçəklər düzmüşlər.
Tədbirdə Azərbaycan Müəllimlər İnstitutu Ağcabədi filialının direktoru, professor Xaqani Məmmədov, rayon İcra hakimiyyəti başçısının müavini Əbülfət Tapdıqov, müəllim və tələbələr çıxış edərək erməni silahlılarının keçmiş SSRİ-nin 366-cı motoatıcı alayının köməyi ilə 1992-ci il fevralın 25-dən 26-na keçən gecə Xocalı şəhərində törətdikləri qırğının acı nəticələri barədə danışmış, faciəni insanlığa qarşı törədilmiş cinayət adlandırmışlar.
Bildirilmişdir ki, həmin gün 613 nəfər, o cümlədən 106 qadın və 63 uşaq xüsusi amansızlıqla qətlə yetirilmiş, yüzlərlə insan yaralanmış, 8 ailə tamamilə məhv edilmiş, 25 uşaq hər iki valideynini, 130 uşaq isə valideynlərindən birini itirmiş, 1275 nəfər əsir götürülmüş, 150 nəfər itkin düşmüşdür. Xocalı soyqırımının qan yaddaşımızda əbədi yaşayacağını vurğulayan natiqlər, ermənilər tərəfindən işğal olunmuş ərazilərimizin tezliklə azad ediləcəyinə inandıqlarını bildirmişlər.
Bölmənin digər xəbərləri
