Xocalı soyqırımının 20-ci ildönümü qeyd olunmuşdur
Bakı, 21 fevral (AZƏRTAC). Azərbaycan xalqının tarixinə qanlı səhifə kimi daxil olmuş Xocalı soyqırımının 20-ci ildönümü Naxçıvan Dövlət Universitetində qeyd olunmuşdur. Bu münasibətlə ali məktəbin pedaqoji fakültəsində keçirilən tədbirdə faciə qurbanlarının xatirəsi bir dəqiqəlik sükutla yad edilmişdir.
Müdhiş qətliamın tarixinə nəzər salan YAP Universitet şəhərciyi ərazi ilk təşkilatının sədri, pedaqoji elmlər üzrə fəlsəfə doktoru, dosent Kamal Camalov Xocalı soyqırımının erməni millətçi-şovinistlərinin 200 il ərzində Azərbaycan xalqına qarşı həyata keçirdiyi etnik təmizləmə, soyqırımı siyasətinin sübutu olduğunu vurğulamış, belə tədbirlərin gənclərin milli mənəvi, vətənpərvərlik ruhunda tərbiyəsində rolundan danışmışdır.
Universitet Gənclər Təşkilatının sədri Arzu Abdullayev “Xocalı soyqırımı beynəlxalq cinayət kimi” adlı məruzəsində bəşər tarixində analoqu olmayan faciənin mənəvi və siyasi-hüquqi müstəvidə tanınmasına yönəlmiş tədbirlərdən söz açmış, Xocalı hadisələrinin dünya ictimaiyyətinə çatdırılması məqsədi ilə gücləri birləşdirməyə səsləmişdir.
Konfransda Xocalı hadisələrini əks etdirən slaydlar nümayiş olunmuşdur.
Bölmənin digər xəbərləri
