Xocalı soyqırımının iyirminci ildönümü ilə əlaqədar silsilə tədbirlər keçirilir
Qazax, 21 fevral (AZƏRTAC). XX əsrin ən böyük faciəsi olan Xocalı soyqırımının iyirminci ildönümünü qeyd etmək üçün Qazax rayonunun təhsil müəssisələrində geniş tədbirlər planı hazırlanmışdır.
Rayon təhsil şöbəsindən AZƏRTAC-a bildirmişlər ki, tədbirlər planına əsasən, ümumtəhsil müəssisələrində Xocalı soyqırımına həsr olunmuş rəsm sərgiləri təşkil olunmuşdur. Təhsil müəssisələrində “Uşaqlar və müharibə” mövzusunda rəsm müsabiqəsi, ”Xocalı faciəsi unudulmayacaq” mövzusunda məktəbdaxili inşa yazı müsabiqələri keçirilmişdir.
Bundan əlavə, fevralın 24-də ümumtəhsil, məktəbəqədər və məktəbdənkənar müəssisələrdə ilk dərs saatı Xocalı soyqırımına həsr olunacaqdır. Fevralın 26-da isə ümumtəhsil məktəblərində Xocalı soyqırımına həsr olunmuş xatirə gecələri, soyqırımının şahidi olan insanlarla görüşlər keçiriləcəkdir.
Bölmənin digər xəbərləri
