“Xocalını unutma!” adlı tədbir keçirilmişdir
Bakı, 21 fevral (AZƏRTAC). Fevralın 21-də Gəncliyə Yardım Fondunda (GYF) “Xocalını unutma!” adlı tədbir keçirilmişdir.
AZƏRTAC xəbər verir ki, əvvəlcə respublikamızın ərazi bütövlüyü uğrunda gedən döyüşlər zamanı şəhid olmuş soydaşlarımızın xatirəsi bir dəqiqəlik sükutla yad edilmişdir.
“Xocalı Soyqırımını Tanıtma” İctimai Birliyinin sədri, “Ana harayı” qəzetinin baş redaktoru Şamil Sabiroğlu Xocalı soyqırımının tarixi, bu qanlı faciəni törədən erməni separatçılarının vəhşiliyi və vandalizmi, soyqırımı həqiqətlərinin dünya ictimaiyyətinə çatdırılması sahəsində görülən tədbirlərdən danışmışdır.
GYF-in icraçı katibi Nəcməddin Akbulut bugünkü Azərbaycan gəncliyinin öz torpaqlarını işğaldan azad etmək uğrunda mübarizə aparmaq iqtidarında olduğunu söyləmişdir. Bildirmişdir ki, 20 il bundan əvvəl körpə uşaq olanlar indi bütün tarixi həqiqətləri bilir və bu vəhşiliklərə göz yuma bilməz.
Dünya Azərbaycanlılarının Həmrəyliyinə Dəstək Cəmiyyətinin prezidenti Tofiq Əlizadə dünyanın bir çox ölkələrində Xocalı soyqırımı ilə bağlı tədbirlərin keçirildiyini bildirmiş və erməni işğalçılarının soydaşlarımıza qarşı törətdikləri vəhşilikdən danışmışdır.
Sonda “Karvan” qrupunun ifasında sözləri şairə Hacı Sürəyya Küskünə, musiqisi Arif Səlimova məxsus olan “Mübariz olaq!” klipi təqdim edilmişdir.
Bölmənin digər xəbərləri
