YAP Gənclər Birliyinin təşəbbüsü ilə Masallıda “Xocalı-tarixin qanlı səhifəsi” mövzusunda tədbir keçirilmişdir
Bakı, 19 fevral (AZƏRTAC). YAP Gənclər Birliyinin təşəbbüsü ilə Masallıda “Xocalı-tarixin qanlı səhifəsi” mövzusunda tədbir keçirilmişdir.
AZƏRTAC xəbər verir ki, əvvəlcə faciə qurbanlarının xatirəsi bir dəqiqəlik sükutla yad olunmuşdur.
Masallı Rayon YAP Gənclər Birliyinin sədri Seymur Nuriyev çıxış edərək, ermənilərin işğalçılıq siyasəti, zaman-zaman etnik azərbaycanlılara qarşı törətdiyi terror və soyqırımı aktları barədə ətraflı məlumat vermişdir. O, ermənilərin 1992-ci il fevralın 25-dən 26-na keçən gecə Xocalıda törətdiyi vəhşilikləri ötən əsrin ən dəhşətli faciəsi olduğunu bildirmişdir.
Sonra YAP fəalı Həmid Süleymanov “Xocalı - tarixin qanlı səhifəsi” mövzusunda məruzə ilə çıxış etmişdir. Bildirilmişdir ki, 1992-ci il fevralın 25-dən 26-na keçən gecə Ermənistan silahlı qüvvələri bütün beynəlxalq hüquq normalarına zidd olaraq, keçmiş sovet ordusunun Xankəndi şəhərində yerləşən 366-cı motoatıcı alayının şəxsi heyətinin dəstəyi ilə Xocalı şəhərinə hücum edərək azərbaycanlılara qarşı soyqırımı törətmişlər. Bir neçə saat ərzində 613 soydaşımız, o cümlədən 106 qadın, 63 uşaq və 70 qoca xüsusi qəddarlıqla qətlə yetirilmişdir.
Digər çıxış edən gənclər də Xocalı hadisələrindən danışmış, erməni vəhşiliyini qətiyyətlə pisləmişlər.
Bölmənin digər xəbərləri
