YAP regionun avanqard siyasi qüvvəsidir
AZƏRTAC xəbər verir ki, rayon təşkilatının yaradılmasının növbəti ildönümü ərəfəsində keçirilən iclasda çıxış edən YAP Nizami rayon təşkilatının aparat rəhbəri Ramil Vəlibəyov Yeni Azərbaycan Partiyasının ötən əsrin 80-ci illərinin sonu 90-cı illərinin əvvəllərində ölkəmizdə meydana çıxan mürəkkəb siyasi situasiyadan, zamanın təxirəsalınmaz tələblərindən irəli gələrək Azərbaycan xalqının arzu və istəklərinin ifadəçisi kimi yarandığını deyib.
Bildirilib ki, partiya yarandığı gündən onun ümummilli lider Heydər Əliyev tərəfindən müəyyənləşdirilən və uğurla həyata keçirilən əsas proqramı Azərbaycanda dövlət müstəqilliyinin qorunub möhkəmləndirilməsindən, ərazi bütövlüyünün təmin edilməsindən, demokratik, hüquqi, dünyəvi cəmiyyət qurulmasından, əmin-amanlıq, ictimai-siyasi sabitlik, milli həmrəylik, güclü sosialyönümlü iqtisadiyyat yaratmaqdan ibarət olub. Məhz buna görə də ümumxalq partiyasına çevrilən, bu gün 600 mindən çox üzvü olan YAP ölkəmizin və regionun ən aparıcı siyasi qüvvəsinə çevrilib.
Qeyd edilib ki, sözlə əməlin birliyi, partiya üzvlərinin ulu öndər Heydər Əliyev ideyalarına sədaqəti YAP-ın nüfuzunu daha da artırıb, ümumilikdə, onun bölgənin aparıcı siyasi qüvvəsi kimi mövqeyini möhkəmləndirib.
Sonra təşkilati məsələlərə baxılıb, yeni təsis edilən ərazi ilk partiya təşkilatının sədri və sədr müavinləri seçilib.
Çıxış edən ərazi ilk partiya təşkilatının sədri Nazilə Dəmirova qeyd edib ki, ölkənin ictimai-siyasi həyatında aparıcı rol oynayan Yeni Azərbaycan Partiyası respublikamızın daim qüdrətlənməsinə, insanların sosial rifah halının yaxşılaşdırılmasına çalışıb. Bu, partiyanın siyasətində dövlətə, xalqa xidmətin öndə dayandığının təsdiqidir.
Tədbirdə çıxış edən gənclər vurğulayıblar ki, Yeni Azərbaycan Partiyası uğurlu fəaliyyəti ilə gənclərin də güclü dəstəyini qazanıb və onların yeganə seçiminə çevrilib. Gənclər həmişə Yeni Azərbaycan Partiyası tərəfindən atılan addımları yüksək qiymətləndiriblər.
Sonda bir qrup gənc partiyaya üzv qəbul olunmaq üçün müraciət edib.
Bölmənin digər xəbərləri
