Yaponiyada fövqəladə vəziyyət rejiminin tətbiqi məsələsi müzakirəyə çıxarıla bilər
Tokio, 31 dekabr, AZƏRTAC
Yaponiyanın koronavirusla mübarizəyə rəhbərlik edən naziri virusun yayılmasının davam edəcəyi təqdirdə hökumətin fövqəladə vəziyyət rejiminin tətbiqi məsələsini müzakirəyə çıxarmasının mümkünlüyünü bildirib.
AZƏRTAC xəbər verir ki, bu barədə Yaponiyanın iqtisadiyyatın bərpa naziri Nişimura Yasutoşi özünü rəsmi “Twitter” səhifəsində yazıb. Nazir əlavə edib ki, bu addım insanların həyatını xilas etmək üçün atıla bilər. N.Yasitoşi bildirib ki, koronavirus pandemiyası nəyin bahasına olursa-olsun dayandırılmalıdır.
Nazir Yaponiya əhalisinə bir daha müraciət edərək, Yeni ili yalnız öz ailə üzvləri ilə birlikdə qarşılamağa çağırıb.
Eyni zamanda, N.Yasitoşi doğmalarını ziyarət etmək üçün tətil günlərində rayonlara gedənlərdən ehtiyatlı davranmağı, çoxsaylı görüşlərdən çəkinməyi xahiş edib. O, həmçinin valideynlərini görmək istəyənlərə onlarla yalnız qapı ağzında görüşməyi, evə girməməyi tövsiyə edib.
Bununla yanaşı, nazir vətəndaşlardan təsadüfi insanlarla görüşdən yayınmağı, Yeni ilin ilk günlərində məbədləri ziyarətdən çəkinməyi xahiş edib.
Əlavə olaraq qeyd edək ki, dekabrın 31-də yerli vaxtla saat 18:20 dəqiqəyə olan son məlumata görə Yaponiyada son sutkada 4515 yeni yoluxma qeydə alınıb. Bunlardan 1337 nəfəri paytaxt Tokioda qeydə alınıb. Hər iki göstərici koronavirus pandemiyası başlayandan ən yüksək antirekorddur.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
