Yaponiyada maşinistsiz sərnişin qatarları hərəkətə başlayıb
Tokio, 24 dekabr, AZƏRTAC
Dekabrın 24-də Yaponiyanın Kyuşü adasında yerləşən Fukuoka şəhərində maşinistsiz sərnişin qatarları hərəkətə başlayıb.
AZƏRTAC Kyodo agentliyinə istinadla xəbər verir ki, adi dəmir yolu ilə hərəkət edən bu qatarlar yol kəsişmələrində işıqforda belə dayanır.
Bildirilir ki, ilkin olaraq baş verə biləcək hər hansı hadisənin qarşısını almaq üçün qatarda maşinist də olacaq. Lakin sonradan bu qatarlar tam avtomat rejimə keçəcək. Elektrik qatarı təqribən 13 kilometr məsafəni qət edir və onun gündə 12 reys həyata keçirəcəyi qeyd edilir.
Agentliyin bildirdiyinə görə, belə qatarların tətbiqi ilk növbədə maşinistlərin çatışmaması ilə əlaqələndirilir. Bu qatarların gələcəkdə bütün Yaponiya ərazisində tətbiqi nəzərdə tutulur. Hazırda Yaponiyada işıqforların olmadığı və insanların hərəkətindən kənarda yerləşən bir sıra dəmir yolu xətlərində maşinistsiz qatarların hərəkətinə icazə verilib.
Bununla yanaşı, Yaponiyanın bir sıra avtomobil istehsalçıları da pilotsuz yüngül avtomobillərin müxtəlif növlərinin hazırlanması istiqamətində işləri davam etdirir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
