Yaponiyada tayfun təhlükəsinə görə təxminən 2 milyon sakinin təxliyəsinə qərar verilib
Pekin, 26 iyun, AZƏRTAC
Yaponiyada yaxınlaşan “Hiqos” və “Mekxala” tayfunlarının səbəb olacağı təhlükəli vəziyyətlə əlaqədar təxminən 2 milyon sakinin təxliyəsinə qərar verilib.
AZƏRTAC xəbər verir ki, Yaponiyanın Meteorologiya Agentliyi Sakit okeandan yaxınlaşan tayfunların ölkənin cənub, qərb və cənub-qərb bölgələrinə güclü yağış və külək gətirəcəyi, nəticədə sel, daşqın və torpaq sürüşməsi ehtimallarının yüksək olması barədə xəbərdarlıq edib.
Proqnozlara görə “Hiqos” tayfunu iyunun 27-də, “Mekxala” isə ertəsi gün Yaponiya sahillərinə çatacaq. Hər iki fırtınanın Yaponiyaya yaxınlaşdıqdan sonra ekstratropik siklonlara çevrilməsi gözlənilsə də, sinoptiklər hələ də təhlükəli hava şəraiti barədə xəbərdarlıq ediblər. Bu səbəbdən Kinki və Kyuşu bölgələrindəki 13 prefekturada 2 milyondan çox sakinin təxliyə əmri altında olduğu bildirilir. Paytaxt Tokio ilə Osaka arasında sürətli qatarların fəaliyyətinin dayandırlacağı gözlənilir.
Yaponiyanın bəzi hissələrində isə aramsız yağışlar davam edir. Kioto prefekturasının Seyka şəhərində sürüşməyə görə ən yüksək səviyyəli təcili təhlükəsizlik xəbərdarlığı elan edilib. Meteorologiya agentliyi bildirib ki, Naqasaki prefekturasındakı Qoto şəhərinə düşən yağıntının miqdarı 600 millimetrə çatıb. Rəsmilər sakinləri qəfil daşqınlar, torpaq sürüşmələri və fırtına ilə əlaqəli digər təhlükələrə qarşı diqqətli olmağa çağırıblar.
Bölmənin digər xəbərləri
