Yaponiyanın Liberal Demokratik Partiyası koronavirus pandemiyasına görə qurultayını təxirə salıb
Tokio, 7 iyul, AZƏRTAC
Yaponiyanın hakim Liberal Demokratik Partiyası (LDP) koronavirus pandemiyasına görə cari ilə planlaşdırılan qurultayını təxirə salıb.
AZƏRTAC xəbər verir ki, bu barədə Kyodo agentliyi LDP-nin rəhbərliyindəki mənbələrə istinadla məlumat yayıb. Bildirilir ki, bu barədə müvafiq qərar LDP-nin inzibati şurası tərəfindən yaxın günlərdə qəbul olunacaq.
Partiyanın Nizamnaməsinə əsasən, qurultay ildə bir dəfə keçirilməlidir. Onun təxirə salınması demək olar ki, görünməmiş hadisə hesab edilir.
Qeyd edək ki, cari ildə LDP-nin qurultayının təşkili əvvəlcə martın 8-nə planlaşdırılmışdı. Lakin koronavirus pandemiyasına görə həmin tarix təxirə salınıb. Bunun əvəzində hakim partiyadan olan deputatların ümumi yığıncağı keçirilib və LDP-nin 2020-ci il üzrə siyasi kursu təsdiq olunub. Qurultayın tarixinin sentyabra dəyişdirilməsinə baxmayaraq, son günlər Tokioda müşahidə edilən koronavirusa yoluxma halları artdığına görə LDP rəhbərliyi bu ideyadan da imtina etmək qərarına gəlib.
Son məlumatlara görə Yaponiyada koronavirusa yoluxanların ümumi sayı 20 min 700 nəfəri ötüb. Onlardan 17 min 700-nün sağaldığı, 990-dan çoxunun isə həyatını itirdiyi bildirilir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
