Bakı, 24 noyabr, AZƏRTAC

Mədəniyyət Nazirliyinin təşkilatçılığı ilə noyabrın 27-dən dekabrın 3-dək Azərbaycanda yaradıcı sənayelər həftəsi (“Yaradıcı həftə”) keçiriləcək. Yaradıcılıq layihəsi Prezident İlham Əliyevin 2022-ci il 22 iyul tarixli Sərəncamı ilə təsdiq edilmiş “Azərbaycan Respublikasının 2022-2026-cı illərdə sosial-iqtisadi inkişaf Strategiyası”nın icrası ilə əlaqədar təşkil olunacaq. Layihənin məqsədi mədəniyyət və yaradıcı sənayelərin vahid sahə kimi formalaşmasının və bazar iştirakçılarının fəaliyyətinin dəstəklənməsi, o cümlədən sahəvi klasterləşmənin təşviqidir.

AZƏRTAC xəbər verir ki, bu barədə Mədəniyyət Nazirliyinin noyabrın 24-də Beynəlxalq Muğam Mərkəzində “Yaradıcı həftə” ilə bağlı keçirdiyi mətbuat konfransında bildirilib.

Qeyd edilib ki, müvafiq dövlət qurumlarının rəhbərləri, yaradıcı sektorun təmsilçiləri, onlarla beynəlxalq və yerli təşkilatın nümayəndələri, yüzlərlə yaradıcı şəxs, şirkətlər və ictimai birliklərin iştirakı ilə keçirilən həftə çərçivəsində Mədəniyyət Nazirliyinin təşkilatçılığı ilə noyabrın 28-30-da Heydər Əliyev Mərkəzində Mədəniyyət və Yaradıcı Sənayelər Forumu keçiriləcək. Forum ekosistem oyunçuları arasında əməkdaşlıq perspektivlərinin və mövcud problemlərin müzakirəsi, yaradıcı sənaye sahəsinin kompleks şəkildə inkişaf imkanlarının araşdırılması məqsədilə təşkil olunacaq. Tədbirdə müvafiq dövlət qurumlarının rəhbərlərinin və kreativ sektorun təmsilçilərinin iştirakı ilə ayrı-ayrı sahələr üzrə yaradıcı sənayelərə dair panel sessiyalar və dəyirmi masalar təşkil ediləcək. Forum müddətində kreativ məhsulların və yaradıcı sənaye nümayəndələrinin fəaliyyətinin tanıdılması məqsədilə Mədəniyyət və Yaradıcı Sənayelər Sərgisi də (MY EXPO - 2023) təşkil olunacaq. Sərgi kino, animasiya, musiqi, “cultech” (mədəniyyət sahəsində startaplar), “gametech” (oyun texnologiyaları), dəb, dizayn kimi yaradıcı klasterləri, eləcə də yaradıcı məkan və regionları bir araya gətirəcək.

Həmçinin Mədəniyyət Nazirliyinin təşkilatçılığı ilə “Yaradıcı müzakirələr” (Creative Talks) layihəsi həyata keçiriləcək. Layihə paytaxtda və regionlarda mədəniyyət və yaradıcılıq sahələrində bacarıqların inkişafını təşviq edən maarifləndirici təşəbbüsdür və yaradıcı subyektlərin formalaşmasının dəstəklənməsinə yönəlib. Layihə çərçivəsində Ümummilli Lider Heydər Əliyevin anadan olmasının 100 illik yubileyi münasibətilə noyabr və dekabr aylarında 10 yaradıcı klaster üzrə 10 bölgədə (Quba, Bakı, Sumqayıt, Lənkəran, Naxçıvan, Gəncə, Mingəçevir, Şəki, Şamaxı, Şuşa) ümumilikdə 100 tədbir keçiriləcək. Tədbirlər seminar, ustad dərsləri, tanınmış şəxslərlə görüşlər və təlimlərdən ibarət olacaq. Müzakirələr noyabrın 27-28-də Bakıda “YARAT” Müasir İncəsənət Məkanında, noyabrın 29-30-da Sumqayıtda Heydər Əliyev Mərkəzində təşkil ediləcək.

Bildirilib ki, noyabrın 29-da Heydər Əliyev Mərkəzində “A-Hub” akselerasiya proqramının milli final mərhələsi keçiriləcək. Mədəniyyət Nazirliyi və ICESCO-nun dəstəyilə reallaşan layihə bu quruma üzv ölkələrdə 2021-ci ildən etibarən innovativ inkişaf sahəsində təşəbbüslərin dəstəklənməsi, biznes subyektlərinin və gənclərin bu sahəyə marağının artırılması, mədəniyyət sahəsi ilə özəl yaradıcı sahibkarlıq subyektlərinin əlaqələndirilməsi məqsədilə reallaşdırılıb. Bu il proqrama Bakı, Sumqayıt və Gəncədən daxil olan müraciətlər əsasında seçilən 13 komanda 6 həftəlik akselerasiya keçib. Milli finalda qalib gələn komandalar böyük finalda iştirak etmək imkanı qazanacaqlar.

“Yaradıcı həftə” çərçivəsində, həmçinin “Musiqi Sənayesi Platforması” (MİP) təşkil olunacaq. Noyabrın 30-da Heydər Əliyev Mərkəzində Azərbaycanın musiqi sənayesinin imkanları və çağırışları bu sahəyə öz töhfəsini verən şəxslərin iştirakı ilə platforma çərçivəsində müzakirə ediləcək. Əsas məqsəd son illərdə bu sahədə mövcud olan trendləri, hadisələri müzakirə etmək, musiqi sənayesinin inkişafı üçün potensial addımları müəyyən etmək, həmçinin bu istiqamətdə beynəlxalq təcrübəni araşdıraraq Azərbaycan musiqi sənayesinə tətbiq etməyin yollarını öyrənməkdir. Panel sessiyalarda Azərbaycan musiqi sənayesinin inkişafı və Azərbaycan musiqisinin təbliği mövzularında fikir mübadiləsi aparılacaq. Tədbirə xarici ekspertlər, beynəlxalq layihələrdə təcrübəsi olan mütəxəssislər, ölkədə musiqi sənayesinə töhfə verən və tanınan şəxslər, o cümlədən prodüserlər və musiqiçilər dəvət olunub. Panel sessiyaların davamı olaraq dekabrın 1-də Beynəlxalq Muğam Mərkəzində “Avroviziya” mahnı müsabiqəsi ilə bağlı müzakirələr (Eurovision Talks) təşkil ediləcək. Tədbirdə bu yarışmada əldə olunan uğurlar, gələcək planlar və bu kimi beynəlxalq musiqi müsabiqələrinin Azərbaycanın musiqi sənayesinə təsirindən danışılacaq.

Bundan başqa, Azərbaycan Respublikası Kino Agentliyinin dəstəyi ilə dekabrın 1-də Nizami Kino Mərkəzində “CINEMO” mobil film festivalının açılış mərasimi olacaq. Festivalın məqsədi Azərbaycanda gənclərin yaradıcı fəallığının dəstəklənməsi, onlar arasında mobil telefon vasitəsilə film istehsalının daha geniş tanıdılması, mobil çəkiliş sahəsində biliklərinin artırılması, istedadlı mobiloqraf və kinematoqrafların üzə çıxarılması, mobil filmin geniş imkanları vasitəsilə sosial dəyərlərin təbliği və istedadlı gənclər arasında yaradıcı əlaqələrin qurulmasıdır. Festivala təqdim ediləcək mobil telefon vasitəsilə çəkilən filmlər münsiflər heyəti tərəfindən dəyərləndiriləcək və sonda qaliblər müəyyən olunacaq.

Həmin gün gənc nəslin milli-mədəni ruhda formalaşmasına töhfə vermək, habelə dövlət dəstəyi ilə istehsal olunmuş filmləri tanıtmaq məqsədilə ali məktəblərdə film nümayişləri keçiriləcək. Son illərdə Mədəniyyət Nazirliyinin dəstəyilə çəkilmiş “Qırmızı bağ”, “Qisas almadan ölmə”, “Daxildəki ada” və “Olimpiya” tammetrajlı bədii filmləri, “Sarılar - Qarabağ atının izi ilə”, “Biz”, “Dağ kəndinin qış günü” və “Qafqaza qayıdış” sənədli filmləri ADA Universiteti, Azərbaycan Dövlət Mədəniyyət və İncəsənət Universiteti, Bakı Dövlət Universiteti, Azərbaycan Dövlət İqtisad Universiteti, Azərbaycan Dillər Universiteti və Azərbaycan Texniki Universitetində nümayiş etdiriləcək.

Dekabrın 2-də Mədəniyyət Nazirliyinin dəstəyilə Nizami Kino Mərkəzində Türk Dünyası Yumor Festivalı da keçiriləcək. Festival Azərbaycan, Türkiyə, Qazaxıstan, Qırğızıstan, Özbəkistan və Tatarıstanın (Rusiya Federasiyası) yumor dünyasının nümayəndələrini bir araya gətirəcək. Festivalda Türk dünyasının yumor ustaları “stand-up” janrında çıxışlar edəcək və sonda münsiflər heyətinin qiymətləndirməsinə əsasən ölkələrdən biri qalib seçiləcək. Festival qarşılıqlı peşəkar və yaradıcı fəaliyyətin təşviq edilməsinə və bu sahədə birgə yaradıcı layihələrin həyata keçirilməsinə töhfə verəcək.

Diqqətə çatdırılıb ki, dekabrın 3-də - “Yaradıcı həftə”nin sonuncu günündə Azərbaycan Animasiya Assosiasiyasının dəstəyilə dünyanın ən böyük animasiya studiyası olan “Disney”in (ABŞ) 100 illiyi münasibətilə tədbir keçiriləcək. Nizami Kino Mərkəzində reallaşacaq tədbir çərçivəsində “Mulan” (1998) filminin nümayişi nəzərdə tutulub.

Mədəniyyət nazirinin müşaviri Cahangir Səlimxanov bildirib ki, “Yaradıcı həftə” gələcəyə yönəlmiş bir layihədir və özündə müxtəlif istiqamətlər üzə rəngarəng tədbirləri ehtiva edir.

Mədəniyyət Nazirliyi Yaradıcı sənayelər və rəqəmsal inkişaf şöbəsinin müdiri Rəşad Əzizov layihənin Azərbaycanda ilk dəfə keçirildiyini söyləyib. O, layihənin qarşıya qoyulan məqsədlərə nail olacağını bildirib.

“YARAT” Müasir İncəsənət Məkanının bədii rəhbəri, kurator Fərəh Ələkbərli həftə çərçivəsində qurumda keçiriləcək tədbirlər haqqında danışıb. O bildirib ki, dekabrın 1-dən 3-dək “YARAT” Müasir İncəsənət Məkanında “Gəl, yarat” adlı yaradıcılıq marafonu keçiriləcək. Müxtəlif yaradıcı klasterlərdə birgə məhsul yaratmağa yönəlmiş kollektiv tədbir beş istiqamət (animasiya, kino, qrafik dizayn, teatr və 3D çap) üzrə reallaşacaq. Dekabrın 3-də hazırlanan məhsulların dəyərləndirilməsi münsiflər heyəti tərəfindən həyata keçiriləcək və hər bir istiqamət üzrə qalib komanda mükafata layiq görüləcək.

SUP.VC İnnovasiya Mərkəzinin direktoru Rəşad Eyvazov bildirib ki, layihə çərçivəsində dekabrın 1-dən 3-dək Nizami Kino Mərkəzində “CulTech” (mədəniyyət sahəsində startaplar) və “GameTech” (oyun texnologiyaları) hakatonları keçiriləcək.

“CulTech” hakatonu kreativ sektorda olan məsələlərə innovativ həll yolları tapmağa çalışan komandaları bir araya gətirən intensiv proqramdır. Müsabiqədə 48 saat müddətində komandalar mentor dəstəyi alacaq, öz yaradıcı və innovativ məhsullarının prototiplərini hazırlayacaqlar. Sonda hər bir komanda üç dəqiqə ərzində prototipi münsiflər heyətinə təqdim etmək imkanı əldə edəcək.

“CulTech” hakatonunda iştirak etmək üçün komanda şəklində müraciət olunmalıdır.

“GameTech” hakatonu zamanı iştirakçılar mentor dəstəyi ilə öz yaradıcı və innovativ oyun layihələrini yaratmaq və nümayiş etdirmək üçün bir araya gələcəklər. 48 saat davam edəcək hakatona oyun yaradıcılığı sahəsində fəaliyyət göstərən proqramçılar, dizaynerlər, rəssamlar, habelə bu sahədə həm təhsil alan tələbələr, həm də uzun illər fəaliyyət göstərən şirkətlərdə çalışan mütəxəssislər qatılacaq.

Dekabrın 3-də münsiflər heyəti tərəfindən qaliblər müəyyən olunacaq və mükafatlandırılacaq.