“Yaşıl Kart” sistemi ilə bağlı birdəfəlik ödəniş və sığorta haqları müəyyənləşdirilib
Bakı, 26 dekabr, AZƏRTAC
Azərbaycan Mərkəzi Bankının (AMB) İdarə Heyəti “Yaşıl Kart” sistemi çərçivəsində fəaliyyət göstərmək istəyən sığortaçıların İcbari Sığorta Bürosu tərəfindən formalaşdırılan cari öhdəliklər ehtiyatı ilə bağlı hesaba ödədikləri birdəfəlik pul vəsaitinin məbləğinin və sistem çərçivəsində fəaliyyət göstərmək hüququ olan sığortaçılar tərəfindən bu sistem üzrə tətbiq ediləcək sığorta haqlarının müəyyənləşdirilməsi barədə qərar qəbul edib.
AZƏRTAC xəbər verir ki, qərara əsasən, “Yaşıl Kart” sistemi çərçivəsində fəaliyyət göstərmək istəyən sığortaçıların İcbari Sığorta Bürosu tərəfindən formalaşdırılan cari öhdəliklər ehtiyatı ilə bağlı hesaba ödənilən birdəfəlik pul vəsaitinin məbləği 10 min manat müəyyənləşdirilib. “Yaşıl Kart” müqavilələri üzrə Türkiyə və İrana gedən Azərbaycanda qeydiyyatdan keçmiş avtonəqliyyat vasitələrinə münasibətdə nəzərdə tutulan sığorta haqları 12-440 manat, Belarus, Moldova, Rusiya və Ukraynaya gedən Azərbaycanda qeydiyyatdan keçmiş avtonəqliyyat vasitələrinə münasibətdə nəzərdə tutulan sığorta haqları 10-400 manat, “Yaşıl Kart” müqavilələri üzrə “Yaşıl Kart” sisteminə daxil olan digər ölkələrə gedən Azərbaycan Respublikasında qeydiyyatdan keçmiş avtonəqliyyat vasitələrinə münasibətdə nəzərdə tutulan sığorta haqları 30-1200 manat, Türkiyə, İran, Belarus, Moldova, Rusiya və Ukraynaya gedən Gürcüstan və Qazaxıstanda qeydiyyatdan keçmiş avtonəqliyyat vasitələrinə münasibətdə nəzərdə tutulan sığorta haqları 15-1630 manat, “Yaşıl Kart” müqavilələri üzrə “Yaşıl Kart” sisteminə daxil olan digər ölkələrə gedən Gürcüstan və Qazaxıstanda qeydiyyatdan keçmiş avtonəqliyyat vasitələrinə münasibətdə nəzərdə tutulan sığorta haqları 30-2389 manat müəyyənləşdirilib. Qərar 2023-cü il yanvarın 1-dən qüvvəyə minir.
Bölmənin digər xəbərləri
