DÜNYA
YASİR ƏRƏFAT: TALEYİMƏ ŞƏHİDLİK YAZILIB
Fələstin lideri İordan çayının qərb sahilində, Rəməllah şəhərindəki iqamətgahında çıxış edərkən demişdir: “Mən mömin bəndəyəm. Taleyim bütün Fələstin xalqının taleyi ilə bağlıdır. Taleyimə şəhidlik yazılıb”.
Xatırladaq ki, aprelin 23-də Şaron İsrail televiziyasına müsahibəsində bildirmişdir: “Mən Ərəfata cismani zərər vurmamaq barədə üç il əvvəl Prezident Buşa verdiyim öhdəlikdən özümü azad hesab edirəm”.
Ərəfatın müşaviri Nabil Əbu Rüdeyna bu bəyanatı şərh edərək, Fələstin liderini “yenilməz və cəsur, öz həyatı barəsində hədə-qorxulara məhəl qoymayan adam” adlandırmışdır. O, Şaronun bəyanatının bütün region üçün təhlükəli olduğunu vurğulamış və Birləşmiş Ştatları bununla əlaqədar öz mövqeyini açıqlamağa çağırmışdır.
Ərəfatın milli təhlükəsizlik məsələləri üzrə müşaviri Cibril Rəcub demişdir ki, fələstinlilərin liderini aradan götürmək cəhdi “Fələstin xalqına, bütün ərəb və müsəlman dünyasına müharibə elan etmək demək olacaqdır”.
Alınan xəbərlərə görə, ABŞ hökuməti İsrailin Baş nazirini Ərəfatın həyatına təhlükə törətməmək barədə öhdəliyinə əməl etməyə çağırmışdır. ABŞ Dövlət Departamentinin rəsmi nümayəndəsi Riçard Bauçer demişdir ki, bu məsələdə bizim mövqeyimizdə heç bir dəyişiklik yoxdur.