YENƏ DƏ İKİLİ VƏTƏNDAŞLIQ HAQQINDA
Sabiq prezident Eduard Şevardnadze bu problemi bir neçə dəfə xatırlatmış və “bəlkə ikili vətəndaşlıq barəsində düşünək”- demişdi. Bununla yanaşı, o, ölkədə iki iri münaqişə zonası olduğunu bəhanə gətirərək, ikili vətəndaşlıq barəsində qanun qəbul edilməsini təxirə salmışdı.
Yeni prezident Mixail Saakaşvili, göründüyü kimi, bütün bunlardan qorxmur və bəyan edir ki, xaricdə yaşayan gürcülərə problemlər yaratmamaq üçün ikili vətəndaşlıq haqqında qanunu qəbul etməyin vaxtı çatmışdır. Bu qanunun qəbul edilməsi onların bir sıra problemlərinin həllini asanlaşdıracaqdır.
Onu da qeyd etmək lazımdır ki, Mixail Saakaşvilinin həyat yoldaşı Sandra Hollandiya vətəndaşıdır və onun oğlu Eduard Hollandiyada anadan olduğundan bu ölkənin vətəndaşlığını almışdır. Görünür, belə bir qanunun qəbul edilməsində yeni prezidentin şəxsi marağı da istisna deyildir.
Parlament seçkilərinə az vaxt qalmışdır. İnamla demək olar ki, gələcək parlament seçkilərində yeni prezident Mixail Saakaşvilinin rəhbərlik etdiyi “Milli hərəkat” bloku və “Burcanadze-demokratlar” bloku parlamentdə çoxluq təşkil edəcəklər. Bundan sonra, təbii ki, ikili vətəndaşlıq barəsində qanunun qəbul edilməsində maneə aradan qaldırılacaqdır. Bu qanunun mənfi və müsbət cəhətlərindən danışanlar da çoxdur.
İkili vətəndaşlıqdan zəif və kiçik, etnik cəhətdən rəngarəng olan ölkələr həmişə boyun qaçırmışlar. Çünki həmin ölkələrdə yaşayan milli azlıqlar özlərinin tarixi, etnik vətəni olan dövlətlərin də vətəndaşlığını avtomatik surətdə alırlar ki, bu da sonradan bəzi problemlər yaradır.
Gürcüstanda 300 minə yaxın azərbaycanlı yaşayır. Belə bir qanunun qəbul edilməsi, şübhəsiz, onların da ürəyincə olacaqdı.
Bölmənin digər xəbərləri
