Yeni Azərbaycan Partiyası Səbail rayon təşkilatının X konfransı keçirilib
Bakı, 5 iyun, AZƏRTAC
İyunun 5-də Yeni Azərbaycan Partiyası Səbail rayon təşkilatının X konfransı keçirilib.
AZƏRTAC xəbər verir ki, konfransda dövlət və hökumət rəsmiləri, Milli Məclisin deputatları, təşkilatın üzvləri, media nümayəndələri iştirak ediblər.
Konfransı YAP Səbail rayon təşkilatının sədr əvəzi, Milli Məclisin elm və təhsil komitəsinin sədri Şəmsəddin Hacıyev açıb.
Azərbaycanın dövlət himni səsləndirildikdən sonra konfransın gündəliyi səsə qoyularaq təsdiq edilib.
Təşkilatın dünyasını dəyişən üzvlərinin xatirəsi bir dəqiqəlik sükutla yad edilib.
YAP Səbail rayon təşkilatının sədr müavini Muxtar Nağıyev IX konfransdan ötən müddət ərzində təşkilatın fəaliyyətinə dair hesabat məruzəsi ilə çıxış edib. Bildirilib ki, ötən dövrdə təşkilatın üzvlərinin sayı 21 mindən 23 min 450 nəfərə çatıb. Partiyanın sıralarında gənclərin, qadınların sayı artıb. Bu gün rayon təşkilatında gənclər partiya üzvlərinin ümumi sayının 66 faizini, qadınlar 56 faizini təşkil edir. Bu da respublika üzrə ən yüksək göstəricidir. Cəmiyyətin ictimai-siyasi həyatında YAP üzvlərinin fəaliyyəti xeyli yüksəlib.
Qeyd edilib ki, YAP Səbail rayon təşkilatının bütün üzvləri bundan sonra da partiyanın proqram və nizamnaməsinə ciddi əməl edəcək, Prezident, Yeni Azərbaycan Partiyasının sədri İlham Əliyevin ətrafında daha sıx birləşəcəklər.
Sonra məruzə ətrafında çıxışlar olub, müzakirələr aparılıb.
Hesabat məruzəsi qənaətbəxş hesab edilib.
Daha sonra təşkilati məsələlər müzakirə olunub.
Yeni Azərbaycan Partiyası icra katibinin müavini, Milli Məclisin intizam komissiyasının sədri Siyavuş Novruzov çıxış edərək YAP Səbail rayon təşkilatının konfrans nümayəndəsi kimi təşkilatın fəaliyyətini qənaətbəxş hesab etdiyini bildirib. O, həm məruzədə, həm də məruzə ətrafında çıxışlarda partiyanın keçdiyi yol, onun gördüyü işlərin əhəmiyyəti, gələcək fəaliyyəti barədə kifayət qədər fikirlərin söylənildiyini qeyd edib. Bildirib ki, ötən müddətdə YAP Səbail rayon təşkilatı ölkəmizin ictimai-siyasi həyatında fəal iştirak edib. Mərhum professor Zahid Qaralov 23 il bu təşkilata rəhbərlik edib. Qurumun sırası, fəaliyyət istiqamətləri genişlənib.
S.Novruzov vurğulayıb ki, bu gün Azərbaycanı istəməyən qüvvələr ölkəmizlə bağlı saxta bəyanatlar verirlər, ədalətsiz qərarlar qəbul edirlər. Buna baxmayaraq, Prezident İlham Əliyevin apardığı cəsarətli siyasət, xalqla iqtidar arasında birlik nəticəsində biz birinci Avropa Oyunlarını da, parlament seçkilərini də uğurla keçirəcəyik. Azərbaycanın nə qədər inkişaf etdiyini bütün dünyaya sübut edəcəyik.
S.Novruzov YAP Səbail rayon təşkilatının sədri vəzifəsinə Şəmsəddin Hacıyevin namizədliyini irəli sürüb.
Məsələ səsə qoyulub və Ş.Hacıyev YAP Səbail rayon təşkilatının sədri seçilib.
Çıxış edən Ş.Hacıyev təşkilatın fəaliyyətini daha da gücləndirmək üçün əlindən gələni edəcəyini bildirib. O, YAP Səbail rayon təşkilatının çox böyük potensiala malik olduğunu, qarşıda duran vəzifələrin uğurla yerinə yetiriləcəyini qeyd edib.
Sonra YAP Səbail rayon təşkilatının Şura, İdarə Heyəti və nəzarət-təftiş komissiyası üzvlərinin seçkisi olub. Şuraya 95, İdarə Heyətinə 29, nəzarət-təftiş komissiyasına 7 üzv seçilib. YAP Səbail rayon təşkilatı sədrinin 6 nəfər müavini seçilib.
Dini Qurumlarla İş üzrə Dövlət Komitəsinin sədri, Yeni Azərbaycan Partiyası icra katibinin müavini Mübariz Qurbanlı konfransda çıxış edərək bildirib ki, Azərbaycan çox böyük uğurlara nail olub və bu uğurların qazanılmasında YAP Səbail rayon təşkilatının da özünəməxsus yeri və rolu var. YAP-ın avanqard təşkilatlarından biri olaraq Səbail rayon təşkilatı ölkəmizin ictimai-siyasi həyatında əhəmiyyətli yer tutur. Bunun səbəbi ondan ibarətdir ki, Səbail rayonunda YAP-ın intellektual potensialı toplaşıb. Bu təşkilatın bütövlükdə partiyamızın fəaliyyətində rolunun artmasında, güclənməsində mərhum professor Z.Qaralovun mühüm xidmətləri olub. Mübariz Qurbanlı əminliklə bildirib ki, yeni seçilən heyət Ulu Öndərimizin ənənələrini uğurla davam etdirəcək.
Səbail Rayon İcra Hakimiyyətinin başçısı Asif Əsgərov çıxış edərək Azərbaycanda gedən inkişaf proseslərindən, birinci Avropa Oyunlarının əhəmiyyətindən danışıb. O, YAP Səbail rayon təşkilatının fəaliyyətində daha böyük uğurlar qazanacağına əminliyini bildirib.
Bölmənin digər xəbərləri
