YENİ PENSİYA VƏ SIĞORTA SİSTEMİ UĞURLA HƏYATA KEÇİRİLİR
Yeni pensiya və sığorta sisteminin formalaşması üçün tam qanunvericilik bazasının yarandığını diqqətə çatdıran S.Müslümov demişdir ki, mövcud qanun və normativ sənədlərin işləkliyini təmin etmək üçün fond tərəfindən bütün zəruru tədbirlər görülür. Müəyyən olunmuş parametrlərə əsasən, sosial pensiyaçıların hamısının sənədləri Əmək və Əhalinin Sosial Müdafiəsi Nazirliyinin yerli qurumlarına təhvil verilmişdir. Bu qəbildən olanlar artıq müxtəlif növlər üzrə dövlətdən müavinət alanlar adlanırlar. Pensiyaçılar kateqoriyasına isə yalnız əmək pensiyaçıları daxildir.
Yanvarın 1-nə olan məlumata görə, ölkəmizdə 1 milyon 181 min 675 pensiyaçının olduğunu bildirən fondun sədri bildirmişdir ki, 2005-ci ilin əvvəlindən bəri pensiyaçıların sayındakı artım 24 min 276 nəfər təşkil etmişdir. Onların 765 min 701 nəfəri, yaxud 64 faizi yaşa görə pensiya alanlardır.
Ötən ilin sonlarında orta aylıq əmək pensiyasının həcmi təxminən 30-31 manat civarında olduğunu diqqətə çatdıran natiq demişdir ki, 2005-ci ilin yekunlarına görə, fond tərəfindən nəzərdə tutulan proqnoz yerinə yetirilmişdir. Qeyri-büdcə təşkilatları tərəfindən proqnoza 102,8 faiz əməl edilmiş, büdcə təşkilatları tərəfindən isə proqnoz 93,4 faiz icra olunmuşdur. Pensiya və müavinətlərə yönəldilən vəsaitin həcmi 2004-cü illə müqayisədə 19,4 faiz artmışdır.
Cari ilin yanvar-fevral aylarında məcburi dövlət siğorta haqlarının yığılmasına büdcə təşkilatları üzrə 13,6 milyon manata (AZN) qarşı 1,76 faiz artıq icra olunduğunu bildirən fond sədri söyləmişdir ki, qeyri-dövlət təşkilatları bu göstəricini 105,1 faiz yerinə yetirərək, 34,2 milyon manata çatdırmışlar. Mart ayı pensiyalarının verilməsi üçün nəzərdə tutulan vəsaitin ayrılmasında heç bir problem yoxdur. Bakı və Sumqayıt şəhərlərinin pensiyaçıları üçün tələb olunan vəsait artıq müvafiq hesablara köçürülmüşdür. Gələn həftənin ilk günlərində isə maliyyələşdirmə prosesi bütün ölkə üzrə başa çatdırılacaqdır.
Yeni pensiya və sığorta sistemi üzrə pensiyaçıların müvafiq fərdi sənədləşdirmə prosesi barədə geniş məlumat verən S.Müslümov sonda jurnalistləri maraqlandıran sualları cavablandırmışdır.
