Yerli startaplarımızdan “Green Baku”nu tanıyaq
Bakı, 25 iyul, AZƏRTAC
"Green Baku" sosial birlik olaraq 2010-cu ilin iyulunda aktiv tələbələr tərəfindən "Facebook" şəbəkəsində qurulub.
İnnovasiyalar Agentliyindən AZƏRTAC-a bildirilib ki, birliyin məqsədi müxtəlif təbəqələrdən olan insanların diqqətini məişət tullantıları probleminə yönəltmək olub. Birlik startap fəaliyyətinə 2010-cu il sentyabrın 5-də, ilk aksiyanın keçirildiyi gündən başlayıb. Əsas hədəfi küçələrdə məişət tullantılarının azaldılması, şəhər sakinləri və məktəblilər arasında maarifləndirici işlərin aparılması, yeni ağacların əkilməsi, həmçinin dövlət və könüllü təşkilatlarının işlərinin koordinasiyası olub.
"Green Baku" 2012-ci ildə "Let's do it World" beynəlxalq ekoloji hərəkatına qoşularaq həm özünü, həm də Azərbaycanı beynəlxalq səviyyədə təmsil edib.
Startap 2015-ci ildə ölkənin ən böyük təmizlik aksiyasını təşkil edib. Aksiyaya qoşulan 600-dən çox könüllü tərəfindən Novxanı sahillərində 10 tondan artıq zibil tullantısı yığılaraq yenidən emala göndərilib.
Startap hazırda "Barama Innovation Center"in tərəfdaşlığı ilə təkrar emal olunmuş kağızlardan dəftərxana ləvazimatlarının hazırlanmasını və milli bazarda satışını hədəfləyib.
Bölmənin digər xəbərləri
