Yolumuz dədə-baba torpaqlarımıza - Qərbi Azərbaycanadır
Bakı, 28 dekabr, AZƏRTAC
Prezident İlham Əliyevin rəhbərliyi ilə yenilməz Ordumuzun Vətən müharibəsindəki tarixi Qələbəsi Azərbaycanın gücünü bir daha dünyaya nümayiş etdirdi. Artıq xalqımızda, həm də beynəlxalq ictimaiyyətdə tam əminlik yaranıb ki, BMT tərəfindən müstəqil Azərbaycan Respublikasının ərazisi kimi tanınmış dədə-baba torpaqlarımıza qayıtmağa qadirik. Bu yolda heç bir qüvvə bizi dayandıra bilməz. İkinci Qarabağ döyüşləri də bunu təsdiqlədi. Beynəlxalq ictimaiyyət də şahid oldu ki, dünyanın super gücə sahib dövlətlərinin 30 il ərzində həll edə bilmədikləri münaqişəni Azərbaycan öz Ordusunun gücü ilə cəmi 44 gün ərzində aradan qaldırdı. Bu yolda ölkəmizə qarşı təzyiq və təhdidlər olsa da, biz ərazi bütövlüyümüzü bərpa etdik. İndi yolumuz Qərbi Azərbaycana - dədə-baba torpaqlarımızadır.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
Prezident İlham Əliyevin bir neçə gün əvvəl Qərbi Azərbaycan İcmasının inzibati binasında yaradılan şəraitlə tanış olarkən həmin ərazidən olan bir qrup ziyalı ilə görüşündə səsləndirdiyi fikirləri xatırladan siyasi şərhçi bildirib: “Azərbaycan Prezidenti dedi ki, bizim heç bir dövlətin ərazisində gözümüz yoxdur. Qərbi azərbaycanlılar qanunsuz olaraq dəfələrlə deportasiyaya məruz qalmış toplumdur. Onların hüquqları bərpa edilməlidir və onlar öz doğma torpaqlarına qayıtmalıdırlar. Prezident İlham Əliyev diqqətə çatdırdı ki, biz əzəli torpaqlarımıza qayıtmaq üçün hərbi əməliyyatlara, silahlı qarşıdurmaya əl atmayacağıq. Tarixi dəlillərdən, beynəlxalq hüquqdan və digər danılmaz faktlardan istifadə edəcəyik”.
Ə.Bədəlov vurğulayıb ki, dövlətimizin başçısının çıxışı Ermənistanda əməlli-başlı narahatlıq, ciddi təşviş yaradıb. Bunun səbəbi isə təkcə ermənilərə deyil, bütün dünyaya bəllidir. İrəvan əzəli Azərbaycan ərazisidir. Prezident İlham Əliyev bir daha bəyan edib ki, Azərbaycan Xalq Cümhuriyyəti İrəvanı Ermənistana verməklə böyük tarixi səhvə imza atıb. Deyib ki, 1918-ci ildə yeni yaradılmış Azərbaycan Xalq Cümhuriyyəti özünün ilk qərarlarından birində bizim tarixi şəhərimizi - İrəvanı Ermənistana faktiki olaraq bağışlamışdır. Bu, bağışlanmaz bir addım idi, bu, xəyanət idi və cinayət idi.
Siyasi şərhçinin sözlərinə görə, erməni tarixçiləri neçə illərdir ki, tarixi saxtalaşdırmaq, azərbaycanlılara məxsus nə varsa, hamısını erməniləşdirməyə çalışıblar. Onlar Qarabağda və Qərbi Azərbaycanda bu çirkin niyyətlərinə nail olmaq istəyirdilər, lakin məqsədlərinə çata bilmədilər. Erməni tarixçiləri tərtib etdikləri saxta xəritələrlə heç kimi inandıra bilmədilər. Çünki Qərbi Azərbaycan bizim tarixi torpaqlarımızdır. Həmin ərazilərdəki bütün yaşayış məntəqələrinin adları Azərbaycan mənşəlidir. O torpaqlarda tarix boyu azərbaycanlılar yaşayıblar.
Otuz ildən sonra azad edilmiş Qarabağ torpaqlarında hazırda aparılan genişmiqyaslı yenidənqurma, bərpa-quruculuq işlərindən söhbət açan siyasi şərhçi bu işlərin Qərbi azərbaycanlıları ruhlandırdığını, dədə-baba torpaqlarına qayıdacaqlarına əminlik yaratdığını bildirib. “Dövlətimizin başçısının əminliklə, - “Qərbi azərbaycanlılar böyük coşqu və həvəslə öz doğma torpaqlarına qayıdıb orada yaşayacaqlar”, - dediyi sözlər bu inamı daha da gücləndirdi. Çünki Prezident İlham Əliyev bir vaxtlar əminliklə “Gün gələcək, biz Qarabağa qayıdacağıq” demişdi. Bu gün xalqımız Böyük Qayıdışın şahididir. İndi isə yolumuz Qərbi Azərbaycanadır. Həmin əzəli tarixi torpaqlarımıza da qayıdışın şahidi olacağıq”, - deyə Əliqismət Bədəlov vurğulayıb.
Bölmənin digər xəbərləri
