Yük avtomobilinin texniki nasazlığı qəzaya səbəb olub
Bakı, 16 mart, AZƏRTAC
Ələt-Astara avtomobil yolunun Biləsuvar rayonu ərazisindən keçən 80-ci kilometrində yük avtomobilinin iştirakı ilə yol-nəqliyyat hadisəsi qeydə alınıb.
Baş Dövlət Yol Polisi İdarəsindən AZƏRTAC-a verilən məlumata görə, Seymur Niftullayevin idarə etdiyi “DAF” markalı, 90 LO 337 dövlət qeydiyyat nişanlı avtomobil Astara istiqamətində hərəkətdə olarkən ön təkərin partlaması nəticəsində idarəetmədən çıxaraq beton yolayrıcına çırpılıb.
Qəza nəticəsində avtomobilə maddi ziyan dəyib, xəsarət alan olmayıb. Faktla bağlı araşdırma aparılır.
“Həmin səbəblərdən dəfələrlə ağır-yol nəqliyyat hadisələrinin baş verdiyini nəzərə alaraq, bir daha sürücüləri, xüsusilə sərnişin və yükdaşıma fəaliyyəti göstərən hüquqi və fiziki şəxsləri nəqliyyat vasitələrinin texniki sazlığına vaxtaşırı nəzarət etməyə, reysqabağı texniki müayinədən keçməyə, nasaz, texniki-təhlükəsizlik baxımından normativ tələblərə cavab verməyən avtomobillə yola çıxmaqdan çəkinməyə çağırırıq”, - deyə məlumatda vurğulanıb.
Bölmənin digər xəbərləri
