YUNANISTAN PREZİDENTİ KONSTANTİNOS STEFANOPULOSUN NİTQİ
Mənim üçün burada olmaq çox böyük şərəfdir. Mən bunu xoş söz
xatirinə demirəm. Səmimi qəlbdən bildirmək istəyirəm ki, Bakı Slavyan Universitetinin fəxri doktoru olmaq mənim üçün çox böyük şərəfdir.
Sizə onu da bildirim ki, mən indiyədək bu cür böyük elmi adlardan imtina etmişəm. Bu, ilk elmi addır ki, mən onu qəbul edirəm. Onun səbəbini mən sizə izah edəcəyəm.
İlk növbədə, buna səbəb Azərbaycanın təhsil ocağının məni bu ada layiq görməsidir. Mən bu ölkəyə ilk dəfədir ki, səfər edirəm və Azərbaycanla ən yaxın əlaqələrin qurulması arzusundayam. Mən Azərbaycanda olan inkişafı çox yüksək qiymətləndirirəm. Azərbaycanın dövlət başçılarından mən ilk dəfə mərhum Prezident cənab Heydər Əliyevlə görüşmüşdüm. O vaxtdan indiyədək onun apardığı siyasətin nəticələrini görürəm və heyran oluram. Heydər Əliyevlə ilk görüşümdən sonra sizin ölkə ilə münasibətlərə böyük diqqət yetirirəm. Ölkələrimiz arasında münasibətlər çox səmimidir. Buna görə də sizin mənə layiq gördüyünüz fəxri doktor adını böyük sevinc hissi ilə qəbul edirəm.
Bunun ikinci səbəbi, bu adın məhz Bakı Slavyan Universiteti tərəfindən verilməsidir. Bilirsiniz ki, qədimdən slavyanlar və yunanlar arasında fikir mübadiləsi mövcud idi. Onların arasında çox sıx əlaqələr var idi.
Ən başlıca səbəblərdən biri isə sizin universitetdə Yunan dili və mədəniyyəti mərkəzinin yaradılmasıdır. Biz onun açılışında iştirak edəcəyik. Ümumiyyətlə, hər hansı xarici dili öyrənmək çox çətin bir sahədir. Çünki dili öyrənən zaman həmin dilin nə vaxtdan yarandığını, insanların bu dildə nə vaxtdan danışdığını öyrənmək lazım gəlir. Dil insanlar üçün vacibdir. Hələ lap qədimlərdə insanlar ancaq mimikaları ilə nə isə anlada bilirdilər. Lakin sonralar sifət əzələlərinin zəifləməsi nəticəsində onların beyinləri inkişaf etməyə başladı. Bunun nəticəsi olaraq insanlar beyinlərini işlədərək, müxtəlif səslərlə bir-birilərini başa salmağa çalışırdılar. Beləliklə, qədim insanlarda dil formalaşmağa başladı.
Əsrlər boyu gedən bu inkişafdan sonra insanlar ünsiyyətin yazı formasını öyrəndilər.
Yunan dili dünyanın ən qədim dillərindəndir. Yunan dilinin inkişafını iki istiqamətə ayırmaq olar. Birinci istiqamət bizim eradan əvvəl 1400-cü ildə, ikinci istiqamət isə eradan əvvəl 1200-cü ildə yaranmışdır. Yunanıstanda və Misirdəki tapıntılar və aparılan tədqiqatlar belə fikir söyləməyə əsas verir ki, yunan dilinin yaranması eramızdan çox əvvəllərə təsadüf edir. Müasir yunan dilinin əlifbası məhz qədim yunan dilinin əlifbasıdır. Bununla yanaşı, yunan dili inkişaf mərhələsi də keçmişdir.
Sizin universitetdə yaradılmış Yunan dili mərkəzinin açılışında görəcəksiniz ki, müasir yunan dilində istifadə olunan sözlər məhz qədim yunan tarixçilərinin, filosoflarının istifadə etdikləri sözlərdir. Yunan dilinin davamlı inkişafı və müasir dövrədək gəlib çatması şərəfli bir hadisədir. Yunan dili bir çox müasir dillərin inkişafına da böyük təkan vermişdir. Fikir versəniz görərsiniz ki, bütün dillərdə xüsusilə də Avropa dillərində yunan dilindən törənmiş sözlər mövcuddur və onlar eyni səslənir.
- Hörmətli tələbələr!Sizə bildirmək istəyirəm ki, siz həyatınızın ən vacib mərhələsindəsiniz.İndi siz biliyinizi artırırsınız, inkişaf edirsiniz. Sizin üçün yaradılmış bütün şəraitlərdən istifadə etməyə çalışın. Elm öyrənin, çünki müəyyən vaxt keçdikdən sonra siz bunlara vaxt tapmayacaqsınız. Mən də cavan olmuşam, mən də tələbəlik illəri keçirmişəm. Lakin o zaman öyrəndiklərim indi yadımda deyildir. Mənim sizə məsləhətim ondan ibarətdir ki, oxuyub elmli olun və gələcəkdə ölkəniz üçün xeyirli vətəndaş olasınız.
Mənim Prezidentlik müddətimin bitməsinə az vaxt qalır. Lakin mən Azərbaycana etdiyim səfəri və sizin universitetdə olan bu gözəl tədbiri yadımda saxlayacağam.
Əminəm ki, Bakı Slavyan Universiteti öz keçmişi ilə, müasir dövrü və gələcəyi ilə dünyanın ən qabaqcıl universitetlərdən biri olacaqdır. Mən Afina Universitetinin hüquq fakültəsini bitirmişəm və çox şadam ki, sizin universitetin fəxri doktoru adına layiq görülmüşəm.
Mən bu şərəfli tədbirə və burada iştirakınıza görə dərin minnətdarlığımı bildirmək istəyirəm. Hamınıza müvəffəqiyyətlər arzu edirəm. Xahiş edirəm, bu kiçik hədiyyəni qəbul edəsiniz. Bu, gümüş qabdır. Orada mənim şəxsi imzam var.
Çox sağ olun.
X X X
Sonra universitetin Yunan şöbəsi tələbələrinin ifasında Yunanıstanın və Azərbaycanın xalq musiqiləri səsləndi, hər iki ölkənin şairlərinin şerləri oxundu. Daha sonra müasir Yunan dili və mədəniyyəti mərkəzinin açılış mərasimi oldu. Yunanıstan Prezidenti Konstantinos Stefanopulos mərkəzin tədris otaqları və kompüter salonu ilə yaxından tanış oldu. Yunanıstan dövləti başçısının adından mərkəzin kitabxanasına yunan dilində tədris vəsaiti və bədii ədəbiyyat hədiyyə edildi.
Yunanıstan Prezidenti Konstantinos Stefanopulos fəxri qonaqlar kitabına ürək sözlərini yazdı.
Mərasimdə Prezident Administrasiyasının humanitar siyasət şöbəsinin müdiri Fatma Abdullazadə, təhsil naziri Misir Mərdanov, xarici ölkələrin səfirləri, Yunanıstan nümayəndə heyətinin üzvləri iştirak edirdilər.
Bölmənin digər xəbərləri
