YUNANISTAN PREZİDENTİ KONSTANTİNOS STEFANOPULOSUN NİTQİ
Xanımlar və cənablar,
Əziz qonaqlar!
Həqiqətən də, Azərbaycana səfərimiz çox uğurlu keçir. Bu, yalnız cənab Prezidentin sadaladığı səbəblərdən irəli gəlmir. Bu səfər ona görə uğurludur ki, Azərbaycan Respublikasının Prezidenti, Azərbaycan xalqı bizə çox böyük qonaqpərvərlik göstərmişdir. Bizi burada istiqanlılıqla qarşılamışlar. Bütün bunlara görə biz Azərbaycanda olduğumuzdan məmnunuq.
Qonaqpərvərlik ənənələri Yunanıstanda da qədimdən mövcuddur. Lakin son 30 il ərzində Yunanıstanda bu ənənə bir qədər zəifləmişdir. Bununla belə, qonaqpərvərlikdə biz sizinlə rəqabət aparsaq, bu, gözəl idman yarışı olardı.
Cənab Prezident, bugünkü imkandan istifadə edərək, bizə göstərdiyiniz qonaqpərvərliyə görə minnətdarlığımızı bildirmək istəyirik. Elə bilirik ki, bizim bu görüşümüz gələcək imkanların, əməkdaşlığın möhkəm əsasını qoymuşdur.
Əgər bu gün bu müasir binadan baxsaq görərik ki, həqiqətən, ətrafda müasir idman qurğuları, meydançalar və üzgüçülük hovuzları vardır.
Ümid edirəm ki, hamımızın səbirsizliklə gözlədiyimiz və böyük maraqla izləyəcəyimiz Afina Olimpiya oyunları uğurla başa çatacaqdır.
Sizə məlum olduğu kimi, qədim Yunanıstan bir sıra nadir inciləri kəşf etmişdir. Olimpiya oyunlarının özünü də buna misal gətirmək olar. İlk dəfə Olimpiya oyunları qədim Yunanıstanda eramızdan əvvəl 776-cı ildə keçirilmişdir. Qədim yunanlar Olimpiya oyunlarına böyük əhəmiyyət vermişlər və onun vacibliyi indi də öz aktuallığını saxlayır, bu ənənə bütün dünyada davam etdirilir.
Olimp dağında keçirilmiş idman yarışları qədim Yunanıstanda keçirilən yeganə yarışlar olmamışdır. Eyni zamanda, Yunanıstanın bir sıra bölgələrində də idman yarışları keçirilirdi. Olimpiya oyunları həmişə mühüm mədəniyyət hadisələri ilə müşayiət olunurdu. İdmançıların yarışları ilə bərabər şairlər, natiqlər öz çıxışlarında Olimpiya oyunlarına ruh verirdilər. Bu dəfə də belə olacaqdır. Olimpiya oyunları qədim yunanların məşq etmək, yaxşı əsgər olmaq arzusundan irəli gəlmişdir. Onlar həmişə qaçmaqda, vuruşmaqda, üzməkdə yaxşıların yaxşısı sırasında olmağa çalışmışlar. Bununla belə, yunanların əsas arzusu, əsas istəyi sülh olmuşdur. Olimpiya oyunları da sülh rəmzidir. Ona görə də bu zaman müharibə edən tərəflər arasında barışıq imzalanır və mədəni tədbirlər keçirilirdi.
Elə vaxtlar olmuşdur ki, Yunanıstanda Olimpiya oyunlarına lazımi diqqət yetirilməmişdir. Bunun da əsas səbəbi romalıların Yunanıstana qarşı təcavüzkar siyasəti idi. Lakin onların təcavüzündən sonra yenidən Olimpiya oyunları bərpa olunmuş və sülh şəraitində davam etdirilmişdir.
Biz Afina Yay Olimpiya oyunlarının keçirilməsinə hazırlaşırıq. Bizim əsas məqsədimiz olimpiya idealını bütün dünyaya tanıtmaqdan ibarətdir. İştirakçılar hansı kürsüyə qalxacaqlarından asılı olmayaraq, Olimpiadada iştirak etdiklərindən qürur duya bilərlər. Olimpiya oyunlarında iştirak etməyin özü hər bir idmançıya qürur hissi gətirir.
Milli Olimpiya Komitəsinin qarşısında bir sıra məqsədlər durur. Bunlardan mühümləri idmana maliyyə yardımı etmək, idmanla məşğul olan gənclərə bilik toplamağa kömək etməkdir. Lakin ən əsası onlara öz ölkələrinin idman şərəfini qorumaq və dövlətinin başını uca etmək hisslərini aşılamaqdan ibarətdir.
Zati-aliləri cənab Prezident!
Siz Olimpiya oyunlarına gələcəksiniz. Siz orada Yunanıstanın imkanları ilə özünüz tanış olacaqsınız. Lakin mən bu gündən Sizi əmin etmək istəyirəm ki, Yunanıstan Olimpiya oyunlarına çox ciddi hazırlaşmışdır.
Qədim yunanlar idmana öz məhəbbətlərini memarlıq abidələri vasitəsilə də ifadə edirdilər. Onlar qaliblərin şəkillərini çəkir, idmançıların qələbə hisslərindən doğan qürurlarını əks etdirirdilər. İndi isə müasir rəssamlar, fotoqraflar bunu tablolar, fotolar vasitəsilə göstərirlər. Cənab Prezident, ona görə biz istərdik ki, Yunanıstan nümayəndə heyəti adından Sizə qədim Olimpiya oyunlarını tərənnüm etdirən bir kitab bağışlayaq. X X X Yunanıstan Prezidenti Konstantinos Stefanopulos Olimpiya oyunları ilə bağlı xüsusi hədiyyələri Azərbaycan Respublikasının Prezidenti İlham Əliyevə təqdim etdi. X X X Görüşdən sonra prezidentlər “Olimpiya ruhu” sərgisi ilə tanış oldular. Sərgiyə baxışdan sonra Yunanıstan Prezidenti Konstantinos Stefanopulos və Azərbaycan Prezidenti İlham Əliyev Azərbaycan televiziyasına qısa müsahibə verdilər.
MÜXBİR: Cənab Stefanopulos, Yunanıstan futbolçuları Avropa çempionatında uğurla çıxış edirlər. Bu münasibətlə Sizi təbrik edirik və fikirlərinizi bilmək bizim üçün maraqlı olardı.
KONSTANTİNOS STEFANOPULOS: Biz Yunanıstan komandasının Avropa çempionatındakı çıxışından qürur duyuruq. İlk dəfədir ki, bizim futbol komandamız belə mötəbər yarışda ən güclü komandalar sırasına çıxmışdır. Növbəti mərhələdə rəqibimiz güclü Fransa komandası olsa da, mən bu oyunda futbolçularımıza uğurlar arzulayıram.
SUAL: Cənab Prezident, Azərbaycandakı Olimpiya hərəkatını necə qiymətləndirirsiniz?
CAVAB: Çox yüksək. Sizin ölkə artıq dünya idman mərkəzlərindən birinə çevrilmişdir. Elə burada, Olimpiya Komitəsinin inzibati binasının ətrafında çoxlu sayda idman kompleksləri, stadionlar var. Bu da onu göstərir ki, Azərbaycanda idmanın, olimpiya hərəkatının inkişafına dövlət səviyyəsində diqqət və qayğı göstərilir.
SUAL: Cənab Prezident, bütün idmançıları bir sual maraqlandırırdı - cənab İlham Əliyev Afina Olimpiya oyunlarına gedəcəkmi? İLHAM ƏLİYEV: Bəli, mən hazırlaşıram, cənab Stefanopulos da məni dəvət etdi. Mən oraya ölkə başçısı kimi, eyni zamanda, Milli Olimpiya Komitəsinin prezidenti kimi gedəcəyəm. Bizim idmançılarla bir yerdə olmaq istəyirəm. Sidney Olimpiya oyunlarını yəqin xatırlayırsınız. Orada biz çox gözəl günlər keçirdik. Ümid edirəm ki, Afinada keçiriləcək Olimpiya oyunlarında da idmançılarımız ölkəmizi ləyaqətlə təmsil edəcəklər.
Bölmənin digər xəbərləri
