Səmimi sözləriniz üçün Sizə təşəkkur edirəm və Sizi əmin edirəm ki, ürəkdən gələn hisslərim yunan xalqının Azərbaycan xalqına olan dostluq münasibətini əks etdirir. Mən, həmçinin, Yunanıstan Prezidentinin Azərbaycan Respublikasına ilk rəsmi səfərində iştirak edən nümayəndə heyətimizin bütün üzvlərinə göstərdiyiniz səmimi və sıcaq qonaqpərvərliyə görə də Sizə təşəkkür edirəm.

Hələ antik dövrlərdən yunanlarla bu regionun əhalisi arasında sıx əlaqələr mövcud olmuşdur. Amma bugünkü əlaqələr daha böyük əhəmiyyət daşıyır və biz dostluğu uca tutaraq, bu əlaqələri inam ruhunda inkişaf etdirməliyik. İzn verin, Sizə xatırladım ki, Yunanıstan Azərbaycanın müstəqilliyini hələ 1991-ci ildə tanımışdır və sonra da Sizin yeni ölkənizlə diplomatik əlaqələr qurmuşdur.

Bugünkü sohbətlərimiz bizi əməkdaşlığımızın nə qədər zəruri olduğuna əmin etdi, eləcə də qarşılıqlı hörmət və inam mühiti yaradılmasının vacibliyini göstərdi. Belə mühitin olması bütün sahələrdə ikitərəfli əməkdaşlığı irəli aparmağa yardım edəcəkdir.

Yunanıstan Bakıda öz səfirliyini 1993-cü ildə açmışdır və bu, ölkənizlə əlaqələrimizin inkişaf etdirilməsinə nə qədər əhəmiyyət verdiyimizi aydın göstərir. Onun fəaliyyətə başlaması Yunanıstan-Azərbaycan əlaqələrinin tərəqqisinə güclü təsir göstərdi.

Fürsətdən istifadə edərək, Azərbaycan parlamentinin Afinada ölkənizin səfirliyini açmaq haqqındakı qərarından nə qədər məmnun olduğumuzu Sizə bildirmək istərdim. Azərbaycanın ölkəmizdə açılacaq səfirliyi Afina ilə Bakı arasında əlaqələri daha da canlandıracaqdır.

Cənab Prezident!

İndiki səfərim çərçivəsində Azərbaycan və Yunanıstan arasında iqtisadi əlaqələrin genişləndirilməsinə yönəlmiş işgüzar görüş keçirmək nəzərdə tutulmuşdur. Odur ki, nümayəndə heyətimizin tərkibinə ölkələrimiz arasında iqtisadiyyat və ticarətin müxtəlif sahələrində əməkdaşlığın perspektivlərini öyrənən biznes qrupu da daxildir. İnanırıq ki, onların burada olması və azərbaycanlı həmkarları ilə aparacağı işgüzar söhbətlər iqtisadi əlaqələrimizi daha da genişləndirəcəkdir.

İndiki səfərin iqtisadi uğuru üc mühüm ikitərəfli iqtisadi sazişin bağlanmasi ilə şərtlənir ki, bu da biznes və sərmayə yatırımının artmasına təkan verəcəkdir.

Enerji sahəsində bizim əlaqələrimiz artıq yaxındır və mən əminəm ki, tezliklə Azərbaycanı Qərbi Avropa ilə birləşdirəcək enerji dəhlizinin istifadəyə verilməsi ilə əlaqələrimiz yeni səviyyəyə çatacaqdır. Bu dəhliz Avropa ilə Asiya arasinda yerləşən ölkənizin coğrafi-strateji və coğrafi-iqtisadi mövqeyini daha da gücləndirəcəkdir.

Mən həmcinin mədəniyyət sahəsində əlaqələrimizin tərəqqisinə sevinirəm. 1994-cü ildə ilk mədəniyyət mübadiləsi proqramının həyata keçirilməsi mədəni fəaliyyət mübadilələrinin yeni dövrünü açdı. Universitetlərimiz arasında əməkdaşlıq böyük əhəmiyyətə malikdir. Əməkdaşlıq Azərbaycan və Yunanıstan ali məktəbləri arasında sazişlər imzalamaq şəklində aparılır. Tezliklə belə razılıqların sayı artacaqdır.

Bu istiqamətdə səylərimizin bəhrəsi kimi, Bakı Slavyan Universitetində yaradılmış Müasir Yunan dili və mədəniyyəti mərkəzini göstərə bilərik. Yunanıstan hökümətinin qrantı ilə işləyəcək həmin tədqiqat və təhsil proqramı mərkəzinin açılışı sabah olacaqdır.

Cənab Prezident!

Avropa İttifaqının genişlənməsi bütün Avropa qitəsi ücün tarixi irəliləyişdir. Yunanıstan Kiprin Avropa ailəsinə daxil olmasını xüsusilə dəstəkləmişdir.

Avropaya doğru genişlənmə İttifaqın həm Şərq, həm də Cənub qonşuları ilə gələcək əlaqələri üçün nadir imkan yaradır. Əslində, genişlənmə zamanı yeni qonşulara daha sıx əlaqəyə ehtiyac duyulması faktı Aİ-nin Avropa qonşuluq siyasətinin qəbul olunmasına gətirib çıxardı. Bu siyasətin əsas məqsədi Avropa İttifaqı ilə onun qonşuları arasında əməkdaşlığı möhkəmləndirmək, siyasi dialoqu və iqtisadi əlaqələri gücləndirmək, ticarət və daxili bazar, ədliyyə və daxili işlər, eləcə də digər sektorlarda birgə işi əlaqələndirməkdir.

Biz xüsusilə şadıq ki, bir neçə gün əvvəl Yunanıstanın təklifi ilə və sədrliyi dövründə Avropa Şurası Azərbaycanı Avropa qonşuluq siyasətinə daxil etməyi qərara almışdır. Bu, bizim siyasətimizdir və Yunanıstan həmişə belə bir siyasəti dəstəkləmişdir ki, Qafqazın hər üc ölkəsi mümkün qədər tezliklə və əslində, eyni vaxtda bu siyasətə qoşulmalıdır.

İcazə verin xatırladım ki, Avropa İttifaqının Cənubi Qafqaz üzrə xüsusi nümayəndəsinin təyin olunması və Azərbaycanla enerji dialoqu aparılması da Yunanıstanın sədrliyi dövrünə təsadüf edir.

Cənab Prezident!

Yunanıstan ölkənizdə siyasi və iqtisadi islahatların gedişinə, demokratik təsisatların güclənməsi və qanunun aliliyi naminə həyata kecirilən tədbirlərə xüsusi maraq göstərir və Sizi işdə ruhlandırır.

Ölkəmiz 2001-ci ildə Azərbaycanın Avropa Şurasına qəbul olunmasını ürəkdən müdafiə etmişdir.

Yunanıstan bizim beynəlxalq təşkilatlarda əməkdaşlığımızı olduqca qənaətbəxş hesab edir. Fürsətdən istifadə edərək, 2005-2006-cı illərdə Yunanıstanın BMT Təhlükəsizlik Şurasında sədrliyə namizədliyini dəstəklədiyi ücün Azərbaycana minnətdarlığımı bildirirəm.

Yunanıstan Dağlıq Qarabağ probleminin həlli üçün Azərbaycan hökümətinin göstərdiyi səylərə böyük əhəmiyyət verir. Avropa İttifaqı kimi, mənim ölkəm də problemin Azərbaycan və Ermənistan prezidentləri arasında birbaşa danışıqlar yolu və Minsk qrupunun vasitəçiliyi ilə ədalətli və həmişəlik həll əldə olunmasına dəstəyini bildirir. Məsələnin həllində beynəlxalq qanunlara əsaslanmaq və regionda sülhə təhlükə yarada biləcək addımlardan çəkinmək lazımdır.

Cənab Prezident!

Yunanıstan Cənub-Şərqi Avropanı xarici siyasətində prioritet hesab edir. Biz qonşularla ikitərəfli və çoxtərəfli əsasda əməkdaşlığa can atırıq ki, regionda sülh və təhlükəsizliyi qoruyaq. Təəssüf ki, regionda qığılcımın alovlanması risqi var. İnanırıq ki, Cənub-Şərqi Avropa ölkələrini Avropa İttifaqına və NATO-ya qoşulması barədə qəti qərarı regionda sülhün və əməkdaşlığın möhkəmləndirilməsinə kömək edəcək, əhaliyə firavanlıq gətirəcəkdir. Yunanıstan həmin ölkələrə Avropa yolunda öz köməyini əsigəməyəcəkdir. Ölkəmizin bu istiqamətdə Salonik sammitində (2003-cü il, 21 iyun) göstərdiyi səylər hamıya məlumdur. Nəticədə, Qərbi Balkan ölkələri Avropa İttifaqına daxil olmağa imkan tapdılar.

Ölkəmiz, həmçinin, regionda ümumi maraqlar naminə Yunanıstan-Turkiyə əlaqələrinin yaxşılaşdırılmasına yönələn əməkdaşlıq siyasətinə üstünlük verir. Biz Yunanıstan-Turkiyə əlaqələrini beynəlxalq qanunlar çərçivəsində və mehriban qonşuluq münasibətləri zəminində qurmaq istəyirik. Ümid edirik ki, səmimi arzumuz qonşularımız tərəfindən eyni səmimiyyətlə qarşılanacaqdır. Baş nazir Ərdoğanın yaxın zamanda Afinaya səfəri bizim ümidimizi də, ölkələrimiz arasında əməkdaşlığa olan istəyi də artırmışdır.

Cənab Prezident,

Kiprdə keçirilmiş referendumun nəticələri göstərdi ki, o, nə iki icma arasında tarazlığı mökəmləndirdi, nə də gələcəkdə əlaqələrin inkişaf edə bilməsinə lazımi təminat yaratdı. Sizi əmin etmək istəyirəm ki, Yunanıstan kimi, Kipr yenə də icmaların maraqları və Avropa İttifaqının əsas prinsipləri çərçivəsində BMT baş katibinin adanın yenidən birləşməsi planına tərəfdardır. Kiprin İttifaqa qəbul olunması Kipr probleminin həllinə yeni dinamizm gətirdi. Görüləcək işlər bəzi əsaslı aydınlıq gətirməkdən və BMT baş katibinin planını mükəmməlləşdirməkdən ibarətdir ki, bundan da hər iki tərəf xeyir görər.

Axırda mən iki aydan sonra dünyanın diqqətini cəlb edəcək Olimpiya oyunları üzərində dayanmaq istərdim. Bu, bizim tarixi irsimizdir, fəxr etməyə haqqımız var. Biz oyunları keyfiyyətli təşkilat və yüksək ədalət ölçüsü ilə keçirməkdə israrlıyıq. Bunun üçün nə lazımdırsa edirik və inanırıq ki, səylərimiz uğurlu nəticəsini verəcəkdir. Həmçinin ümid edirik ki, antik dövrlərdən keçib gələn böyük Olimpiya barışığı xalqlar arasında sülhü və əməkdaşlığı möhkəmləndirəcəkdir.

Cənab Prezident,

İnanıram ki, bizim bugünkü danışıqlarımız ölkələrimiz arasında gələcək əlaqələrimizin inkişafı və dərinləşməsi üçün möhkəm zəmin yaradacaqdır. Elə həmin ruhda da qonaqpərvərliyinizə görə bir daha Sizə təşəkkür edirəm və bu badəni Sizin və xanımınızın şərəfinə, dost Azərbaycan xalqının tərəqqisi və xoşbəxt gələcəyi naminə qaldırıram.