“Yura dövrünün parkı” filminin məşhur ulduzu Sem Nil vəfat edib
London, 13 iyul, AZƏRTAC
“Yura dövrünün parkı” (Jurassic Park) film seriyasında doktor Alan Qrant obrazı ilə dünya şöhrəti qazanan aktyor Sem Nil 78 yaşında vəfat edib.
AZƏRTAC “The Independent”ə istinadla xəbər verir ki, aktyor Avstraliyanın Sidney şəhərində yaxınlarının əhatəsində dünyasını dəyişib. Bildirilib ki, onun ölümü qəfil və gözlənilməz olub.
Şimali İrlandiyada anadan olan Sem Nil yeddi yaşında ailəsi ilə birlikdə Yeni Zelandiyaya köçüb və sonradan ölkənin ən tanınmış aktyorlarından birinə çevrilib. O, 1993-cü ildə ekranlara çıxan “Yura dövrünün parkı” film seriyasında doktor Alan Qrant rolunu canlandırıb və daha sonra franşizanın digər filmlərində də eyni obrazı ifa edib. Aktyor həmçinin “Piano”, “Qırmızı Oktyabrın ovu” (The Hunt for Red October), “Event Horizon” və “Peaky Blinders” serialındakı Belfast polis rəisi obrazı ilə də tanınıb.
2023-cü ildə xərçəng diaqnozu qoyulan Sem Nil bu ilin aprel ayında xəstəliyə qalib gəldiyini və xərçəngdən tam sağaldığını bildirmişdi. Karyerası boyunca müxtəlif janrlarda yaratdığı yaddaqalan obrazlarla seçilən aktyor kino tənqidçiləri tərəfindən dövrünün ən istedadlı və çoxşaxəli aktyorlarından biri kimi qiymətləndirilirdi.
Bölmənin digər xəbərləri
