Yusif Eyvazov: Qalibləri dürüst və düzgün seçəcəyik. Qoy yeni “ulduz” doğsun!
Bakı, 3 iyun, AZƏRTAC
Müsabiqə həmişə çox vacib bir hadisədir. İstəyirəm ki, bu gün burada iştirak edən gənc artistlər başa düşsünlər: əgər sənə heç bir müsabiqədə qalib gəlmək və ya üçüncü tura keçmək nəsib olmayıbsa, bu, qətiyyən karyera qura bilməyəcəyin və ya qalib gələnlərdən daha pis olduğun anlamına gəlməz. Sadəcə olaraq, səhnəyə çıxıb oxuduğun anda qalib olmaq üçün lazım olan səviyyədə və yüksəklikdə olmamısan. Ona görə də narahat olmayın, çalışmağa davam edin və ən əsası, səsinizlə münsiflər heyətini təəccübləndirməyə çalışın. Biz isə qalibləri və finalçıları çox dürüst və düzgün seçəcəyik. Qoy bir “ulduz” doğulsun!
AZƏRTAC xəbər verir ki, bu sözləri Bakıda vokalçıların Bülbül adına IX Beynəlxalq Müsabiqəsinin açılış mərasimində müsabiqənin münsiflər heyətinin sədri, Azərbaycanın Xalq artisti, Azərbaycan Dövlət Akademik Opera və Balet Teatrının direktoru Yusif Eyvazov söyləyib.
Münsiflər heyətinin sədri olmaq şərəfinə layiq görüldüyü üçün təşkilatçılara təşəkkür edən Yusif Eyvazov müsabiqə iştirakçılarına uğurlar arzulayıb.
“Əziz həmkarlar, bu müsabiqənin gördüyü “ulduz” münsiflər heyətinin üzvlərindən, münsiflər heyəti sədrlərindən ibarət o kəhkəşandan sonra sizin aranızda olmaq, habelə birlikdə finala yüksələcək və qalib gələcək layiqli artistləri seçmək mənim üçün böyük qürur və şərəfdir. Bu, mənim üçün böyük şərəf olmaqla bərabər, həm də böyük məsuliyyətdir”, - deyə Xalq artisti bildirib.
Bölmənin digər xəbərləri
