Zaqatalada 20 Yanvar şəhidlərinin xatirəsi yad edilmişdir
Zaqatala, 20 yanvar (AZƏRTAC). “Azərbaycan xalqının tarixinə “Qanlı Yanvar” faciəsi kimi daxil olmuş 1990-cı il 20 Yanvar hadisələrindən iyirmi iki il keçir. 20 Yanvar faciəsi qəhrəmanlıq və şəhidlik zirvəsi kimi xalqımızın qan yaddaşına əbədi həkk olunmuşdur. Qanlı faciədən 22 il vaxt keçməsinə baxmayaraq, xalqımız o müdhiş gecəni daim xatırlayır, bu vəhşiliyi törədənlərə öz dərin nifrətini bildirir”.
Bu fikirlər 20 Yanvar faciəsinin 22-ci ildönümü ilə əlaqədar Zaqatala rayon mədəniyyət evində keçirilən konfransda səslənmişdir. Konfrans iştirakçıları əvvəlcə foyedə təşkil edilmiş “Tariximizin qan yaddaşı” adlı rəsm sərgisinə baxmışlar. Şəhidlərin xatirəsi bir dəqiqəlik sükutla yad edildikdən sonra 20 Yanvar hadisələrindən bəhs edən sənədli film nümayiş etdirilmişdir. Tədbirin sonunda rayon icra hakimiyyəti tərəfindən şəhid ailələrinə maddi yardım göstərilmişdir.
Gün ərzində rayon ictimaiyyətinin, ayrı-ayrı əmək kollektivlərinin nümayəndələri, məktəblilər, ağsaqqal və gənclər şəhərin mərkəzi meydanında 20 Yanvar şəhidlərinin xatirəsinə ucaldılmış abidə-kompleksin qarşısına gələrək, abidənin önünə qırmızı qərənfillər düzmüş, şəhidlərin xatirəsini yad etmiş, onların ölməz ruhu qarşısında baş əymişlər.
Həmin gün rayonun qəsəbə və kəndlərində də 20 Yanvar şəhidlərinin xatirəsinə həsr olunmuş tədbirlər, anma mərasimləri keçirilmişdir.
Bölmənin digər xəbərləri
