MƏDƏNİYYƏT
Zəfər Gününə həsr olunmuş müsabiqənin qalibi Bakıdan zəngin təəssüratla qayıdıb
![](/files/galleryphoto/2023/1/1200x630/1679129431510794339_1200x630.png)
![](/files/galleryphoto/2023/1/1200x630/1679129431560671455_1200x630.png)
![](/files/galleryphoto/2023/1/1200x630/167912943118653338_1200x630.png)
![](/files/galleryphoto/2023/1/1200x630/167912943153613663_1200x630.png)
Tbilisi, 18 mart, AZƏRTAC
Azərbaycanın Zəfər Günü ilə əlaqədar dörd ölkənin - Azərbaycan, Gürcüstan, Türkiyə və Bosniya və Hersoqovinada 16 yaşdan yuxarı gənclər arasında keçirilən “Türkün şanlı zəfəri” adlı müsabiqənin qalibləri müəyyən olunub. Müsabiqədə Gürcüstandan Şenay Sadiq 1-ci, Laşa İsabalayev 2-ci, Aysun Məmmədova isə 3-cü yerin qalibi olublar. Qaliblərə mükafatlar Bakıda təqdim olunub. Birinci və ikinci yerlərin qalibləri Şenay Sadiq və Laşa İsabalayev martın 13-dən 17-dək Bakıda səfərdə olublar.
Müsabiqədə ikinci yerin qalibi, Tbilisidəki “Alyans” Gənclər Mərkəzinin yetirməsi Laşa İsabalayev təəssüratlarını AZƏRTAC-la bölüşüb.
Bildirib ki, Azərbaycan Gənclər Fondunun və “Gənclərin Töhfəsi” İctimai Birliyinin təşkilatçılığı ilə keçirilən beynəlxalq müsabiqədə dörd ölkədən - Gürcüstan, Azərbaycan, Türkiyə və Bosniya və Hersoqovinadan 16 yaşdan yuxarı gənc rəssamlar iştirak ediblər. Hər ölkədən üç nəfər ayrı-ayrı nominasiyalar üzrə ilk üçlükdə yer alıblar.
Laşa İsabalayev deyib ki, Zəfər Gününə həsr etdiyim əsərdə Azərbaycan bayrağı, vətən torpağını öz çiyinlərində saxlayan qəhrəman əsgərlərimiz, Bakının tarixi abidələri, Şəhidlər xiyabanı və 44 günlük Vətən müharibəsinin simvollarından olan Xarıbülbül əksini tapıb.
Onun sözlərinə görə, müsabiqə dekabrda keçirilsə də nəticələr fevralın sonlarında məlum oldu. Bu vaxt ərzində müsabiqə iştirakçıları nəticələri böyük həsrətlə gözləyirdi. Qalib olmaq hamının arzusu idi. Ona görə ki, müsabiqədə qalib olmaq həm də, böyük qələbənin sevincini bir daha yaşamağa bərabər idi.
“Bu sevinci bizə yaşatdıqları üçün, təşkilatçılara və münsiflər heyətinə dərin təşəkkürümü bildirirəm”, - deyə L.İsabalayev vurğulayıb.
Qeyd edək ki, Laşa İsabalayev Xocalı faciəsi ilə bağlı Azərbaycan səfirliyinin Tbilisidə təşkil etdiyi rəsm müsabiqəsində də iştirak edib. O, bu müsabiqədə “Ən yaradıcı rəssamlar” nominasiyasında qalib olub.
Bakıya səfərindən danışan gənc rəssam deyib: “Bakı öz gözəlliyi, təmizliyi və yeniliyi ilə adamı valeh edir. Bakının küçələrini gəzib-dolaşarkən özünü tamam başqa aləmdə hiss edirsən. Səfər çərçivəsində Diasporla İş üzrə Dövlət Komitəsində, Atəşgahda, İncəsənət Muzeyində, Hərbi Qənimətlər Parkında, İçərişəhərdə, Qız Qalasında, Şirvanşahlar Sarayında olmaq da çoxdankı arzum idi. Qənimətlər Parkını gəzərkən özünü qalib kimi hiss edirsən. Qalib ölkənin qələbə qürurunu yaşayırsan. Eyni zamanda, buradakı Ermənistan xəritəsinə baxanda fikirləşirsən, onlara nə lazım idi?. Onlar niyə bu müharibəni başlatdılar?. Burada həm də, müharibənin dəhşətlərini düşünürsən və özün-özünə belə bir sual verirsən, müharibə kimə lazımdır?”.
Onun sözlərinə görə, İçərişəhəridə tarixi abidələr kompleksi, Tbilisinin meydan adlanan ərazisini xatırladır. Buradakı evlərin, tarixi abidələrin bərpadan sonrakı gözəlliyi bir ayrı dünyadan xəbər verir. Xüsusən də mədəniyyətin qədimiliyini görürsən. Bu insanların öz tarixinə, mədəniyyətinə sahib çıxdığının şahidi olursan. Qız Qalası abidəsi, Şirvanşahlar sarayı, məscidlər hər bir insanı qədim tarixə aparır: “Milli Xalça Muzeyi də möhtəşəmdir. Bir xalçanın üzərində Azərbaycanın xəritəsinin əks olunması bir başqa mənzərə idi.
Qədim geyim və zinət əşyalarını, musiqi alətlərini də görmək xoş idi. Azərbaycanda musiqi alətlərinə, musiqiyə həvəs də çoxdur”.
Müsabiqədə qalib gəlmək və Bakıya səfər Laşa İsabalayevdə gələcəyə yeni həvəs yaradıb: “Mən bundan sonra bir çox yeni layihələrdə iştirak etmək qərarına gəlmişəm. Azərbaycan, Gürcüstan, Türkiyənin ortaq və fərqli mədəniyyətlərini, incəsənətlərini yaşatmaq, ortaq mədəni abidlərə dair yeni rəsm əsərləri yaratmaq və hər kəsi dünyaya bir məkandan baxmağı aşılamaq istəyirəm”.
Xətayi Əzizov
AZƏRTAC-ın xüsusi müxbiri
Tbilisi