Zelenski ilk dəfə olaraq 20 maddəlik sülh planının məzmununu açıqlayıb
Kiyev, 24 dekabr, AZƏRTAC
Ukrayna, ABŞ və Rusiyanın iki aydır müzakirə etdiyi sülh planı 20 maddədən ibarətdir.
AZƏRTAC xəbər verir ki, bu barədə Prezident Volodimir Zelenski jurnalistlərlə görüşdə bildirib. Zelenskinin sözlərinə görə, sülh planının özündən əlavə, təhlükəsizlik zəmanətləri ilə bağlı üçtərəfli sənəd var - Ukrayna, ABŞ və Avropa. ABŞ tərəfindən Ukrayna üçün təhlükəsizlik zəmanətləri ilə bağlı ikitərəfli sənəd və Ukraynanın çiçəklənməsi üçün yol xəritəsi - ABŞ ilə danışıqlar yolu ilə əldə edilmiş və 2040-cı ilə qədər inkişaf baxışını özündə əks etdirən bərpa və iqtisadi inkişaf üzrə sənəd mövcuddur.
Ukrayna üçün 20 maddədən ibarət sülh planı Ukraynanın suverenliyinin təsdiqlənməsini nəzərdə tutur. Rusiya ilə Ukrayna arasında qeyd-şərtsiz hücum etməmək haqqında Saziş nəzərdə tutulur. Təmas xətti boyunca monitorinq mexanizmi yaradılacaq. Ukrayna güclü təhlükəsizlik zəmanətləri alacaq.
Rusiya bütün zəruri qanunlarda Avropa və Ukraynaya qarşı hücum etməmə siyasətini təsbit edəcək.
Ukrayna müəyyən bir konkret vaxtda Aİ üzvü olacaq və Avropa bazarına qısamüddətli imtiyazlı giriş əldə edəcək. Aİ üzvlüyü Ukraynanın təhlükəsizlik zəmanətlərinin bir hissəsidir, biz üzvlük tarixini təsbit etmək istəyirik.
Ukrayna üçün güclü qlobal inkişaf paketi nəzərdə tutulur, bu, ayrıca investisiya haqqında sazişdə müəyyən ediləcək.
Bərpa məsələlərini həll etmək üçün bir neçə fond yaradılacaq. Məqsəd 800 milyard dollar cəlb etməkdir.
Bu sazişin bağlanmasından sonra Ukrayna ABŞ ilə azad ticarət haqqında Sazişin bağlanması prosesini sürətləndirəcək. Ukraynanın nüvə silahından azad statusu nəzərdə tutulur.
Ukrayna və Rusiya məktəblərdə müxtəlif mədəniyyətlərin anlaşılmasını və tolerantlığını təşviq edən, irqçilik və qabaqcadan əmələ gəlmiş yanlış fikirləri aradan qaldıran təhsil proqramlarını tətbiq etməyi öhdələrinə götürürlər. Ukrayna dini tolerantlıq və azlıqların dillərinin qorunması ilə bağlı Aİ qaydalarını tətbiq edəcək.
Gələcək ərazi razılaşmaları barədə razılığa gəldikdən sonra həm Rusiya, həm də Ukrayna bu razılaşmaları zorla dəyişdirməməyi öhdələrinə götürürlər.
Rusiya Ukraynanın Dnepr çayından və Qara dənizdən kommersiya məqsədləri üçün istifadəsinə mane olmayacaq.
Açıq məsələləri həll etmək üçün humanitar komitə yaradılacaq. “Hamı hamıya” prinsipi ilə əsir mübadiləsi, uşaqlar və siyasi məhbuslar da daxil olmaqla mülki girovların qaytarılması və münaqişə qurbanlarının problemlərinin və əzablarının həll edilməsi.
Ukrayna saziş imzalandıqdan sonra mümkün qədər tez seçkilər keçirməlidir. Bu saziş hüquqi cəhətdən məcburi olacaq. Onun icrasına Donald Trampın sədrlik etdiyi Sülh Şurası tərəfindən nəzarət olunacaq, təmin ediləcək. Pozuntulara görə sanksiyalar nəzərdə tutulacaq.
Bütün tərəflər bu saziş ilə razılaşdıqdan sonra tam atəşkəs dərhal qüvvəyə minəcək.
Saziş hər iki tərəf öz öhdəliklərini yerinə yetirdikdən sonra qüvvəyə minəcək. Təhlükəsizlik zəmanətləri yalnız sazişin tam təsdiqlənməsi və ya referendumla təsdiqlənməsi ilə qüvvəyə minəcək.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
