MƏDƏNİYYƏT
Abdulla Şaiqin mənzil-muzeyində şairə həsr edilmiş biblioqrafiyanın təqdimatı olacaq
Bakı, 9 dekabr, AZƏRTAC
Dekabrın 15-də Abdulla Şaiqin mənzil-muzeyində “Abdulla Şaiq. Biblioqrafiya” kitabı və “Abdulla Şaiq” elektron məlumat bazasının təqdimat mərasimi keçiriləcək.
Muzeydən AZƏRTAC-a bildirilib ki, “Abdulla Şaiq. Biblioqrafiya” kitabı və “Abdulla Şaiq” elektron məlumat bazası F.Köçərli adına Respublika Uşaq Kitabxanası tərəfindən “Uşaq ədəbiyyatı xəzinəsindən” seriyası çərçivəsində tərtib və nəşr edilib. Biblioqrafiyanın tərtibçiləri Nazilə Tahirova, Leyla Qafarova, Tünzalə Əzizova, ixtisas redaktoru və buraxılışa məsul Şəhla Qəmbərova, redaktoru Gülbəniz Səfərəliyevadır. Kitabın “Ön söz”ünün müəllifi Alxan Bayramoğlu, rəyçilər Kərim Tahirov və Ülkər Talıbzadədir.
Azərbaycan uşaq ədəbiyyatının klassiki, görkəmli şair, nasir, dramaturq, ədəbiyyatşünas, böyük pedaqoq, ictimai xadim Abdulla Şaiqin həyat və yaradıcılığına həsr olunmuş bu biblioqrafiyada ədibin 1906-2016-cı illərdə dərc edilmiş əsərləri və onun haqqında yazılan materiallar öz əksini tapıb. Göstərici ədəbiyyatşünas alimlər, tədqiqatçılar, kitabxanaçı-biblioqraflar və geniş oxucu kütləsi üçün nəzərdə tutulub.