Françesko La Kamera: Qarşıdakı onillik elektrikləşmə onilliyi olmalıdır
Bakı, 7 sentyabr, AZƏRTAC
Enerji keçidi prosesində elektrikləşmə əsas istiqamət olmalıdır. Qarşıdakı onillik elektrikləşmə onilliyi olmalıdır.
AZƏRTAC xəbər verir ki, bunu Beynəlxalq Bərpa Olunan Enerji Agentliyinin (IRENA) Baş direktoru Françesko La Kamera Bakı İqlim Fəaliyyəti Həftəsi 2026-nın açılışında deyib.
O bildirib ki, gələcəyin enerji sistemləri yalnız enerji resurslarının yerləşdiyi ərazilərlə deyil, bərpaolunan enerji potensialından istifadə imkanları, infrastrukturun inkişafı və bazarların əlaqələndirilməsi ilə müəyyənləşəcək.
Françesko La Kamera qeyd edib ki, bu baxımdan Mərkəzi Asiya üçün, o cümlədən regionun Avropa ilə əlaqələndirilməsi istiqamətində mühüm imkanlar yaranır.
IRENA-nın Baş direktoru COP29 zamanı Bakıda əldə olunan dinamikanın COP31-ə qədər davam etdirilməsinin vacibliyini vurğulayıb. Onun sözlərinə görə, əsas diqqət iqlim sahəsindəki ambisiyaların konkret fəaliyyətə çevrilməsinə, sektorlar üzrə layihələrin həyata keçirilməsinə, investisiyaların artırılmasına, əlverişli siyasətlərin formalaşdırılmasına və maliyyələşməyə yönəldilməlidir.
Françesko La Kamera Azərbaycanın bərpaolunan enerjini milli prioritetlərin mərkəzinə yerləşdirməsini yüksək qiymətləndirib. O, Azərbaycanın 2027-ci ilədək 2 giqavat gücündə yaşıl enerji layihələrinin həyata keçirilməsi ilə bağlı hədəfinə diqqət çəkib.
O qeyd edib ki, Azərbaycan və Mərkəzi Asiya ölkələri geniş bərpaolunan enerji potensialından istifadə etməklə regional enerji əlaqələrinin və yaşıl enerji dəhlizlərinin inkişafı üçün əlverişli mövqedədir.
Françesko La Camera bildirib ki, IRENA-nın COP29 çərçivəsində Bakıda yaratdığı Mərkəzi Asiyada Bərpa Olunan Enerji üzrə Sürətləndirilmiş Tərəfdaşlıq bu istiqamətdə investisiyaların təşviqinə, regional bağlantıların gücləndirilməsinə və dayanıqlı inkişafın dəstəklənməsinə xidmət edir. Tərəfdaşlığın hazırkı üzvləri Azərbaycan, Tacikistan, Qırğızıstan, Qazaxıstan və Özbəkistandır.
O, bu təşəbbüs çərçivəsində 2026-cı ilin iyununda Bakı Enerji Həftəsi çərçivəsində Mərkəzi Asiya İnvestisiya Forumunun keçirildiyini də diqqətə çatdırıb.
Bölmənin digər xəbərləri
