Bakı, 10 sentyabr, AZƏRTAC

Göygöl rayonunda yerləşən Respublika Süni Mayalanma Mərkəzi Cənubi Qafqazda analoqu olmayan bir mərkəzdir. Azərbaycanda ərzaq təhlükəsizliyinin təmin olunması istiqamətində görülən tədbirlər çərçivəsində ölkədə heyvan mənşəli məhsulların istehsalını artırmaq, mal-qaranın cins tərkibini yaxşılaşdırmaq, süni mayalanma tədbirlərinin həyata keçirilməsini sürətləndirmək baxımından bu mərkəzin müstəsna rolu var.

Bunu AZƏRTAC-a açıqlamasında Respublika Süni Mayalanma Mərkəzinin direktoru Ramiq Abbasov deyib.

Onun sözlərinə görə, hazırda respublikanın bütün bölgələrində süni mayalanma mütəxəssisləri fəaliyyət göstərir: “Mütəxəssislər və məntəqələrimiz azot və toxumla təmin olunub. Bu gün iri fermer təsərrüfatları ilə sıx əlaqələr qurulub və təsərrüfatlar süni mayalanma tədbirlərini həyata keçirmək üçün mərkəzlə müqavilə bağlayıblar”.

Ramiq Abbasov mərkəzdə 6 cins üzrə 36 baş heyvanın saxlandığını deyib: “Heyvanlar artıq yerli mühitə adaptasiya olunublar. Mərkəzdə dünyanın ən məşhur iribuynuzlu heyvan cinslərindən olan “Holşteyn”, ətlik cinslərdən “Şarole”, südlük-ətlik cinlərdən “Şvis”, ətlik-südlük cinslərdən “Simmental” inəklərinin törədiciləri bəslənilir. Heyvanlar əsasən Almaniyadan gətirilib və törədicilərdən yüksək keyfiyyətli toxum əldə olunur. Bu törədicilərdən toxum əldə etmək üçün mütəxəssislərimiz xüsusı təlimlərdə iştirak ediblər. Bildiyiniz kimi, hazırda ölkəmizdə süni mayalanma yolu ilə alınan buzovlara görə 100 manat subsidiya verilir. Bu səbəbdən fermerlərimizin öz təsərrüfatlarında süni mayalanma tədbirlərinin aparılmasına marağı daha da artıb”.

“Respublika Süni Mayalanma Mərkəzi ölkədə qaramalın çoxaldılması üçün damazlıq materialına olan tələbatı tam qarşılayır. Mərkəzin fəaliyyəti yerli heyvan cinslərindən istifadə olunmaqla yetişdirilmiş cinslərin də genetik imkanlarından faydalanmağa şərait yaradacaq”, - deyə mərkəzin direktoru qeyd edib.