Çendu, 21 sentyabr, AZƏRTAC

Çinin Sıçuan vilayətinin inzibati mərkəzi olan Çendu şəhərində 17-ci Qərbi Çin Beynəlxalq Sərgisi işə başlayıb.

AZƏRTAC xəbər verir ki, BMT-nin İnkişaf Proqramının dəstəyi və Sıçuan vilayəti hökumətinin təşkilatçılığı ilə keçirilən sərgi əhəmiyyətinə görə Çində ilk onluğa daxildir. Çinin “Bir kəmər, bir yol” strategiyası üçün mühüm əhəmiyyət daşıyan və “Çin yeri erada, Qərbi Çinin yeni uğurları” adlı builki sərgidə yerli iştirakçılarla yanaşı, bir neçə ölkə də təmsil olunub.

Ümumi sahəsi 260 min kvadratmetr olan sərginin açılış mərasimində çıxış edən Çin Dövlət Şurası sədrinin (Baş nazirin) müavini Xu Çunxua bildirib ki, sərginin əsas məqsədi “Bir kəmər, bir yol” strategiyasının icrasına dəstək vermək, regional inkişafı təşviq etməkdir.

Tədbirdə Azərbaycanı iqtisadiyyat nazirinin müavini Sahib Məmmədovun başçılığı ilə nümayəndə heyəti təmsil edir. Nümayəndə heyəti Sıçuan vilayətinin liman şəhərlərindən olan Lucounun sərgidəki pavilyonu ilə tanış olub.

Qeyd edək ki, İqtisadiyyat Nazirliyinin dəstəyi, Azərbaycanın Çindəki səfirliyində ticarət nümayəndəliyinin, Lucou şəhər hakimiyyətinin və “Eastern Allfriends” şirkətinin təşkilatçılığı ilə yaxın günlərdə Lucou şəhərində “Azərbaycan Ticarət Evi” açılacaq. Lucou şəhərinin Qərbi Çin Beynəlxalq Sərgisindəki pavilyonunda həmin ticarət evinə dair videoçarxlar nümayiş olunur. Bundan başqa, pavilyonda “Made in Azerbaijan” brendi ilə istehsal olunan məhsullarımız, habelə ölkəmizə dair suvenirlər nümayiş edilir. Lucou pavilyonunu ziyarət edənlərə “Azərbaycan Ticarət Evi”, ölkəmizdə istehsal edilən keyfiyyətli məhsullar, Azərbaycanın biznes və sərmayə mühiti, logistika və turizm potensialı, xalqımızın zəngin mədəniyyəti barədə məlumat verilir.

Azərbaycan nümayəndə heyətinin rəhbəri Sahib Məmmədovun Sıçuan vilayətinin vitse-qubernatoru Pen Yusin ilə görüşündə ölkələrimiz arasında əməkdaşlığın müxtəlif sahələrdə uğurla inkişaf etdiyi bildirilib.

Sıçuan vilayəti ilə Azərbaycan arasında münasibətlərin tarixçəsinə toxunan vitse-qubernator, 2008-ci ildə dağıdıcı zəlzələdən sonra vilayətdə orta məktəb binasının inşasına Azərbaycanın göstərdiyi maddi yardımı məmnunluqla xatırladıb. O, Sıçuan vilayətinin Çin yüklərinin Avropaya dəmir yolu ilə daşınmasında ölkə əhəmiyyətli qovşaq rolunu oynadığını deyib. Çin rəsmisi yüklərin bir neçə istiqamətdə Avropaya daşınmasına baxmayaraq, vacib nəqliyyat-logistika imkanları olan Azərbaycanın potensialının maraq doğurduğunu, bu istiqamətdə əməkdaşlığa hazır olduqlarını bəyan edib.

Nazir müavini Sahib Məmmədov Azərbaycan-Çin münasibətlərinin dövlət başçıları İlham Əliyevin və Si Cinpinin siyasi iradəsi ilə hərtərəfli inkişaf etdiyini deyib. Bildirib ki, iki ölkə arasında iqtisadi-ticarət əlaqələrində son illər fəallıq müşahidə olunur. Bura iki ölkə arasında əməkdaşlığa dair müxtəlif sənədlərin imzalanması, hökumətlərarası komissiyanın fəaliyyəti, Azərbaycandan Çinə ixrac missiyalarının təşkili, Çində Azərbaycanın ticarət nümayəndəliyinin fəaliyyətə başlaması, Urumçidə “Azərbaycan Şərab Evi”nin açılması, biznes forumlarının təşkili və s. daxildir.

S.Məmmədov Azərbaycanın tranzit-logistika imkanları, o cümlədən Bakı-Tbilisi-Qars dəmir yolu layihəsinin də daxil olduğu Transxəzər nəqliyyat dəhlizi barədə məlumat verib, Çin yüklərinin Avropaya və əksinə istiqamətdə qısa müddətdə daşınmasında bu potensialdan istifadənin hər iki tərəf üçün faydalı olacağını bildirib.

S.Məmmədovun Lucou şəhərinin meri Liu Çian ilə görüşündə tarixi İpək Yolu üzərində yerləşən Azərbaycanın müasir dövrdə Avropa ilə Asiya arasında nəqliyyat dəhlizi rolunu oynadığı vurğulanıb.

Mer Lucou şəhəri ilə Azərbaycan arasında əlaqələrə toxunaraq, yaxın günlərdə şəhərdə açılacaq “Azərbaycan Ticarət Evi”nin bu əməkdaşlığa böyük töhfələr verəcəyinə əminliyini ifadə edib.

Nazir müavini S.Məmmədov öz növbəsində “Azərbaycan Ticarət Evi”nin açılmasının iqtisadi-ticarət əlaqələrinin genişlənməsi ilə yanaşı, Lucouda Azərbaycanın tanıdılmasına, mədəni və turizm sahəsində əməkdaşlığa da müsbət təsir edəcəyini deyib.

Şahin Cəfərov

AZƏRTAC-ın xüsusi müxbiri

Çendu