Yaponiya televiziyasında AZƏRTAC-ın 100 illiyinə həsr olunan xüsusi veriliş yayımlanıb VİDEO
Tokio, 3 mart, AZƏRTAC
Yaponiyanın “World Investors TV” internet telekanalında Azərbaycan Dövlət İnformasiya Agentliyinin (AZƏRTAC) yaranmasının 100 illiyinə həsr olunmuş xüsusi veriliş yayımlanıb.
Verilişdə qonaq qismində Azərbaycan-Yaponiya Dostluq Mərkəzinin sədri, Dünya Azərbaycanlılarını Əlaqələndirmə Şurasının üzvü Xəlil Kələntər və AZƏRTAC-ın Yaponiyadakı xüsusi müxbiri Vüqar Ağayev iştirak ediblər. Aparıcılar - telekanalın prodüseri Kazuyasu İşida və Yasuhiro İşibaşi AZƏRTAC-ın son illər dünya informasiya məkanında böyük uğurlara imza atdığını diqqətə çatdırıblar.
Azərbaycanın yeganə rəsmi xəbər mənbəyi sayılan və müasir dövrdə beynəlxalq informasiya məkanının mühüm fiqurlarından birinə çevrilmiş AZƏRTAC-ın keçdiyi tarixi yol, qazandığı uğurlar barədə yapon tamaşaçılara ətraflı məlumat verilib. Qeyd edilib ki, ötən 100 ildə çətin, lakin şərəfli yol keçən agentlik üzərinə düşən missiyanı hər bir tarixi mərhələdə yüksək peşəkarlıqla yerinə yetirib, Azərbaycan tarixinin son 100 ilinin salnaməsini yaratmağa müvəffəq olub.
Vurğulanıb ki, müstəqilliyin bərpasından sonra AZƏRTAC-ın inkişafı və dövlət informasiya agentliyi kimi formalaşması ulu öndər Heydər Əliyevin adı ilə bağlıdır. Agentlik hazırda səkkiz dildə fasiləsiz informasiya yayır, yalnız ölkə daxilində deyil, eyni zamanda, onun hüdudlarından uzaqlarda mötəbər xəbər mənbəyi kimi qəbul olunur. Bu gün onun 21 xarici ölkədə və Azərbaycanın bölgələrində geniş müxbir şəbəkəsi var.
Son illər mühüm inkişafa nail olan AZƏRTAC dünya informasiya məkanında layiqli yer tutur, beynəlxalq və regional media qurumlarında fəal təmsil olunur. Təsadüfi deyil ki, 2016-cı ildə Prezident İlham Əliyevin himayəsi, Birinci vitse-prezident Mehriban xanım Əliyevanın dəstəyi, Heydər Əliyev Fondunun və AZƏRTAC-ın təşkilatçılığı ilə Bakı Dünya Xəbər Agentliklərinin V Konqresinə, Asiya və Sakit Okean Ölkələri Xəbər Agentlikləri Təşkilatının (OANA) XVI Baş Assambleyasına ev sahibliyi edib. 2016-2019-cu illərdə hər iki quruma uğurla sədrlik edən AZƏRTAC Azərbaycanın adını dünya mətbuat tarixinə yazıb.
Məlumat verilib ki, hazırda AZƏRTAC 50-yə yaxın xarici xəbər agentliyi ilə əməkdaşıq müqaviləsi imzalayıb, 150-dək agentliklə informasiya mübadiləsi aparır. Hər gün 8 dildə 700-ə yaxın informasiya, video və foto xəbər hazırlayaraq öz kanalları ilə yayır. Agentliyin beş veb-resursu və iki veb-servisi (interaktiv xəritə), üç mobil tətbiqi, fotosaytı və zəif görənlər üçün resursu fəaliyyət göstərir. Eyni zamanda, agentliyin 30-dan çox sosial şəbəkə və messenger profili var. “YouTube” kanallarında videoxəbərlərə baxışların 83 faizi mobil cihazların payına düşür.
Verilişdə AZƏRTAC-ın Yaponiyanın aparıcı Kyodo news və JIJI PRESS informasiya agentlikləri ilə yanaşı, “World Investors TV” internet telekanalı ilə sıx əməkdaşlıq etdiyi də vurğulanıb. Azərbaycana səfəri zamanı AZƏRTAC-ın İdarə Heyətinin sədri, beynəlxalq media məkanında yüksək peşəkarlığı ilə tanınan Aslan Aslanovla görüşünü xatırladan K.İşida getdikcə genişlənən ikitərəfli əməkdaşlığın məmnunluq doğurduğunu deyib. Bildirib ki, AZƏRTAC-ın dəvəti ilə Bakı Humanitar Forumunda iştirakı, orada dünya mediasının qarşılaşdığı problemlərlə əlaqədar müzakirələrə qatılması onun yaddaşında silinməz izlər buraxıb.
Verilişdə, həmçinin AZƏRTAC-a göstərilən dövlət qayğısından söhbət açılıb. Bildirilib ki, agentlik əlamətdar yubileyini yaxın aylarda yeni ofisində qeyd edəcək. Prezident İlham Əliyevin Sərəncamına əsasən inşa edilən binanın tikintisi artıq yekunlaşıb. Yeni binada ən müasir informasiya-kommunikasiya texnologiyaları quraşdırılacaq, dünya standartlarına uyğun iş şəraiti yaradılacaq.
Qarşılıqlı informasiya mübadiləsinin həm iki dövlət, həm də iki xalq arasında dostluq əlaqələrinin inkişafına mühüm töhfələr verdiyi də verilişdə xüsusi qeyd edilib.
Veriliş boyunca AZƏRTAC-ın fəaliyyətini əks etdirən fotolar və video çarx nümayiş olunub.
AZƏRTAC-ın Yaponiya bürosu
Bölmənin digər xəbərləri
