Efiopiyanın nüfuzlu EBS TV kanalı: Beynəlxalq ictimaiyyət Dağlıq Qarabağı Azərbaycanın tərkib hissəsi kimi tanıyır VİDEO
Bakı, 10 noyabr, AZƏRTAC
Azərbaycanın Efiopiyadakı səfiri Elman Abdullayev bu ölkənin nüfuzlu, geniş auditoriyaya malik olan televiziya kanalı EBS TV-yə müsahibə verib. Səfir Efiopiya ictimaiyyətini Ermənistanın Azərbaycana qarşı apardığı işğalçılıq və etnik təmizləmə siyasəti barədə ətraflı məlumatlandırıb, Azərbaycan dövlətinin xalqımızın əzəli tarixi torpaqlarını işğaldan azad etmək və işğalçı Ermənistanı sülhə məcbur etmək məqsədilə özünü müdafiə etmək hüququndan istifadə etdiyini izləyicilərin diqqətinə çatdırıb. Bu barədə AZƏRTAC-a Azərbaycanın Efiopiyadakı səfirliyindən məlumat verilib.
Səfir Elman Abdullayev öncə münaqişənin tarixi, Azərbaycan ərazilərinin 20 faizinin Ermənistan tərəfindən 30 ilə yaxın işğal altında saxlanması haqqında məlumat verib. O, Azərbaycan ərazilərinin tam və qeyd-şərtsiz azad edilməsi ilə bağlı BMT Təhlükəsizlik Şurasının 4 qətnaməsinə bu illər ərzində Ermənistan tərəfindən məhəl qoyulmadığını, xüsusilə son illərdə Ermənistanın hərbi-siyasi rəhbərliyinin aqressiv, təxribatçı və məsuliyyətsiz çıxışlarının, Azərbaycanın yeni ərazilərinin işğal edilməsinə çağırışlarının münaqişənin sülh yolu ilə həllini mümkünsüz etdiyini diqqətə çatdırıb.
Beynəlxalq birliyin laqeyd münasibəti, həmçinin işğalçı əməllərinə və törətdiyi müharibə cinayətlərinə görə cəzasızlıq nəticəsində daha da azğınlaşan işğalçı Ermənistanın cari ilin iyul ayından başlayaraq Azərbaycanın dövlət sərhədi boyunca təxribatlara cəhd etməsi, son olaraq 27 sentyabr tarixində cəbhə xətti boyunca Azərbaycan mövqelərinə, o cümlədən dinc əhalinin sıx məskunlaşdığı yaşayış məntəqələrinə ağır artilleriyadan istifadə etməklə hücumu haqqında danışan səfir E.Abdullayev Azərbaycan Ordusunun Ermənistanın hücum cəhdinin qarşısını almaq və təmas xətti boyunca yaşayan dinc əhalinin təhlükəsizliyini təmin etmək üçün əks-hücum əməliyyatına başladığını bildirib.
Azərbaycanın öz torpaqlarını azad etmək məqsədilə apardığı haqlı mübarizəsində beynəlxalq humanitar hüquqa tam riayət etdiyini, ordumuzun sadəcə legitim hərbi hədəflərə zərbə endirdiyini vurğulayan Azərbaycan səfiri bunun əksinə olaraq təcavüzkar Ermənistanın münaqişə zonasından xeyli uzaqda yerləşən Gəncə, Tərtər, Bərdə, Mingəçevir şəhərlərinin yaşayış məntəqələrinə raket zərbələri endirdiyini, o cümlədən dinc əhali arasında tələfatı artırmaq məqsədilə qadağan olunmuş kaset bombalarından istifadə edərək müharibə cinayəti törətməsi haqqında məlumat verib, 27 sentyabr tarixindən etibarən cəbhə xəttindən xeyli uzaqda yerləşən bu yaşayış məntəqələrinə endirilən artilleriya zərbələri nəticəsində aralarında körpələrin, qadınların və qocaların da olduğu 90-dan artıq dinc sakinin həlak olduğunu, 400-ə yaxın insanın yaralandığını bildirib.
Hərbi əməliyyatların dayandırılması üçün əsas şərtin işğalçı Ermənistan ordusunun Azərbaycan ərazilərindən qeyd-şərtsiz və gecikmədən çıxarılması olduğunu qeyd edən diplomat beynəlxalq birliyin münaqişənin həllinə əsas töhfəsinin Ermənistana işğalçılıq siyasətini dayandırması və silahlı qüvvələrini Azərbaycan ərazilərindən dərhal çıxarılması üçün təzyiq etməsinin vacibliyini vurğulayıb.
Azərbaycanda qədim multikulturalizm ənənələrinin mövcud olduğunu bildirən səfir E.Abdullayev ölkəmizdə əsrlərboyu sülh və qardaşlıq şəraitində yaşayan müsəlman, xristian və yəhudilərin milli ideologiyamız olan azərbaycançılıq ideologiyası altında birləşərək və bir yumruğa dönərək Vətənimizin ərazi bütövlüyünün müdafiəsi naminə təcavüzkar dövlətə döyüş meydanında layiqli cavab verdiyini və tarixi ədalətin bərpa edildiyini vurğulayıb.
Bölmənin digər xəbərləri
