MƏDƏNİYYƏT


Respublika Uşaq Kitabxanası Beynəlxalq Uşaq Kitabları Şurasına üzv qəbul edilmişdir

Bakı, 4 aprel (AZƏRTAC). F.Köçərli adına Respublika Uşaq Kitabxanası Beynəlxalq Uşaq Kitabları Şurasına (İnternational Board on Books for Young People – İBBY) üzv qəbul edilmişdir.

Kitabxanadan AZƏRTAC-a bildirmişlər ki, İBBY dünya üzrə kitabları və uşaqları bir araya toplayan təşkilat olduğundan ona üzvlük kitabxananın beynəlxalq əlaqələrini genişləndirəcəkdir.

1953-cü ildə İsveçrənin Sürix şəhərində yaradılmış İBBY-nin hazırda dünya üzrə 70 milli bölməsi fəaliyyət göstərir. Türkiyə, İran Rusiya, Meksika, Litva, Kuba, Hollandiya, ABŞ, Ukrayna, İsveç, Yaponiya, Almaniya, Fransa və s. kimi ölkələrin sırasında indi Azərbaycan da vardır.

Milli bölmələrdə iş regional və beynəlxalq səviyyədə fəaliyyət göstərir. Bu bölmələrin üzvləri yazıçılar, illüstratorlar, naşirlər, tərcüməçilər, jurnalistlər, müəllimlər, tənqidçilər, alimlər, kitabxanaçılar və ictimai xadimlərdir.

İBBY-nin fəaliyyətini onun İcraiyyə Komitəsi təyin edir: müxtəlif ölkələrdən olan 10 nəfər və prezident iki ildən bir təşkilatın konqresləri zamanı milli bölmələrdən Baş Assambleyaya seçilir. Onların hamısı könüllü əsaslarla işləyir. Təşkilatın gündəlik işlərini isə Bazel şəhərində yerləşən katiblik yerinə yetirir. UNESCO-da və UNİCEF-də rəsmi qeyri-hökumət təşkilatı statusuna malik İBBY 1990-cı ildə BMT tərəfindən qəbul olunmuş Beynəlxalq Uşaq Hüquqları Konvensiyasının prinsiplərini əsas tutur.

İBBY, eyni zamanda, müəyyən beynəlxalq təşkilatlarla birgə fəaliyyət göstərərək, dünyada beynəlxalq uşaq kitabı yarmarkaları, sərgilər, seminarlar təşkil edir. Bu il də İBBY möhtəşəm sərgi keçirir. Portuqaliyanın paytaxtı Lissabonda yanvarın 13-dən başlayan sərgidə dünya üzrə 50 rəssamın 150 sənət əsəri nümayiş olunur. Sərgi aprelin 8-dək davam edəcəkdir.

Hər il milli bölmələrdən seçilmiş bir yazıçı və bir illüstrator dünya uşaqlarına çağırış hazırlayırlar. Bu, xırda kitab formasında olan illüstrasiyalı nağıl, hekayə, yaxud şeir ola bilər.

İBBY-nin xüsusi mükafatı – Asahi (Asahi Reading promotion Award) uşaq mütaliəsinin təbliğində kömək göstərənlərə təqdim edilir. İki ildən bir təşkilat tərəfindən Qızıl medal verilir. Bu, dünyanın ən prestijli ədəbi mükafatlarından sayılır və hətta “Kiçik Nobel mükafatı” da adlanır. Təşkilatın ildə dörd dəfə nəşr olunan “Kitab quşu” (Bookbird) jurnalı dünya uşaq ədəbiyyatından bəhs edir.

İBBY-nin rəsmi saytında F.Köçərli adına Respublika Uşaq Kitabxanasına dair geniş məlumat yer almışdır.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.