REGİONLAR
Kür çayında qanunsuz balıq ovu ilə məşğul olanlara qarşı reyd keçirilib VİDEO
Şəmkir, 3 mart, Ruslan Novruzoğlu, AZƏRTAC
Respublika Balıqçılar İttifaqı və Ekologiya və Təbii Sərvətlər Nazirliyinin əməkdaşları tərəfindən Kür çayının Şəmkir rayonunun ərazisindən keçən hissəsində qanunsuz və qadağan olunan vasitələrlə balıq tutmaqla məşğul olan şəxslərə qarşı reyd keçirilib.
AZƏRTAC xəbər verir ki, keçirilən reyd zamanı Kür çayı sahilində qanunsuz, həmçinin istifadəsinə tamamilə qadağan edilən vasitələrdən istifadə etməklə balıq tutulması prosesinin aparıldığı məlum olub. Xüsusən dövlət tərəfindən istifadəsinə qadağa qoyulan sintetik torlardan istifadə edilməsi faktları aşkarlanıb.
“Reyd bir daha göstərdi ki, brakonyerlərlə yanaşı hətta bəzi kvota sahibləri belə tətbiq olunan qaydaları kobud şəkildə pozur. Söhbət ondan gedir ki, rəsmi icazəsi olan bəzi şəxslər göstərilən rəqəmlərdən dəfələrlə artıq balıq tutur”, - deyə Azərbaycan Balıqçılar İttifaqının sədri Əfqan Əliyev bildirib.
Reyd zamanı brakonyerlərə məxsus motorlu qayıq aşkarlanıb. Qadağan olunan sintetik torlar tamamı ilə məhv edilib. Ümumiyyətlə, təkcə Kür çayının qərb bölgəsindən keçən hissəsində deyil, Azərbaycanın bir çox ərazilərində balıq tutulması prosesi qaydaların kobud şəkildə pozulması ilə də müşahidə edilir.