CƏMİYYƏT
DSX Sahil Mühafizəsinin Mərkəzi Regional Şöbəsinin yeni inzibati binası istifadəyə verilib VİDEO
Bakı, 25 may, AZƏRTAC
Dövlət Sərhəd Xidməti (DSX) dəniz sərhədlərinin etibarlı mühafizəsinin təmin olunması, sahil mühafizə bölmələrinin texniki təchizatının müasirləşdirilməsi, yeni infrastrukturların yaradılması istiqamətində fəaliyyətləri davam etdirir.
DSX-nin mətbuat mərkəzindən AZƏRTAC-a bildiriblər ki, bu tədbirlər çərçivəsində mayın 25-də Dövlət Sərhəd Xidməti Sahil Mühafizəsinin Mərkəzi Regional Şöbəsinin yeni inzibati binası istifadəyə verilib.
Bununla əlaqədar keçirilmiş açılış mərasimində çıxış edən Dövlət Sərhəd Xidmətinin rəisi general-polkovnik Elçin Quliyev Mərkəzi Regional Şöbənin yeni binasının açılışı münasibətilə şəxsi heyəti təbrik edib, dənizçi sərhədçilərin bu əlamətdar günü müzəffər Silahlı Qüvvələrimizin Vətən müharibəsində qazandığı qələbənin sevinci ilə qeyd etdiklərini vurğulayıb.
Dövlət Sərhəd Xidmətinin digər hərbi birləşmələri ilə yanaşı, Sahil Mühafizəsinin hərbi qulluqçularının də Zəfər savaşında qəhrəmancasına vuruşduqları, 100-dək dənizçi-sərhədçinin yüksək dövlət təltiflərinə layiq görüldüyü qeyd olunub.
Azərbaycanın milli sərhəd strategiyasının banisi ulu öndər Heydər Əliyevin hakimiyyətə qayıdışından sonra dəniz sərhədlərinin mühafizəsində əsaslı dönüşün yarandığı, Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı İlham Əliyevin diqqət və qayğısı sayəsində bu fəaliyyətlərin keyfiyyətcə yeni mərhələyə qədəm qoyduğu, 2005-ci il fevralın 18-də Dövlət Sərhəd Xidmətinin Sahil Mühafizəsinin təsis edilməsi ilə Xəzər dənizində milli maraqlarımızın yüksək səviyyədə qorunması üçün daha geniş imkanların yarandığı, son illər ərzində DSX Sahil Mühafizəsinin 12 müasir gəmisinin dəniz kampaniyasına qəbul olunduğu bildirilib.
Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin DSX Sahil Mühafizəsinin yeni gəmilərinə baxış məqsədilə 8 dəfə hərbi hissəyə gəlişinin dəniz sərhədlərinin mühafizəsi məsələlərinə ali diqqətin ifadəsi olması xüsusi vurğulanıb.
Qısa müddətdə səmərəli sərhəd mühafizə sisteminin formalaşdırılması, zəruri infrastrukturun təkmilləşdirilməsi istiqamətində kompleks tədbirlərin görüldüyü, hazırda DSX Sahil Mühafizəsinin dəniz mühitində istənilən çağırışa çevik reaksiya göstərərək Xəzər dənizinin Azərbaycan Respublikasına aid hissəsində enerji ehtiyatlarının, neft-qaz boru kəmərlərinin və platformalarının qorunması, beynəlxalq terrorizmə, kütləvi qırğın silahlarının komponentlərinin qanunsuz yayılmasına, qeyri-leqal miqrasiyaya və narkotik qaçaqmalçılığına qarşı mübarizədə yüksək nailiyyətlər əldə etməsi xüsusi vurğulanıb.
Dövlət Sərhəd Xidmətinin Sahil Mühafizəsi tərəfindən “Azərbaycan Xəzər Dəniz Gəmiçiliyi” Qapalı Səhmdar Cəmiyyəti, Nəqliyyat, Rabitə və Yüksək Texnologiyalar Nazirliyinin Dövlət Dəniz Agentliyi, Müdafiə Nazirliyinin Hərbi-Dəniz Qüvvələri, Daxili İşlər Nazirliyinin Nəqliyyatda Baş Polis İdarəsi və Xəzər dənizində fəaliyyət göstərən digər dövlət orqanları ilə qarşılıqlı faydalı əməkdaşlıq münasibətlərinə ciddi önəm verilməsi, bu orqanlarla birgə fəaliyyət nəticəsində dənizdə təhlükəsizliyin təmin olunması və xidməti tapşırıqların daha effektiv icrasına şəraitin yaradılması qeyd edilib.
Tədbirdə Vətən müharibəsində şücaət və qəhrəmanlıq göstərərək Zəngilanın, Cəbrayılın, Xocəvəndin, Suqovuşanın azad olunmasında fərqləndiklərinə görə Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev tərəfindən təltif edilmiş hərbi qulluqçuların orden və medallar təqdim olunub.
Mərasimdə "Azərbaycan Xəzər Dəniz Gəmiçiliyi" Qapalı Səhmdar Cəmiyyətinin sədri Rauf Vəliyevin rəhbərliyi ilə heyət iştirak edib. Cəmiyyətin 4 əməkdaşı “Hərbi əməkdaşlıq sahəsində xidmətlərə görə” medalı ilə təltif edilib.
Açılış mərasimindən sonra tədbir iştirakçıları ikimərtəbəli binada yaradılmış şəraitlə tanış olublar. Buradakı xidməti otaqlara, konfrans zalına, tibb otağına, yeməkxanaya, eləcə də şəxsi heyət üçün yaradılmış istirahət otaqlarına, idman meydançasına, dənizçi sərhədçilərin istifadəsində olan xüsusi müşahidə, aşkaretmə, rabitə və s. texniki avadanlığa baxış keçirilib.