Ceyhun Bayramov: Azərbaycan-Ermənistan sərhədinin delimitasiyası ilə bağlı Ermənistanın isterik davranışları anlaşılan deyil VİDEO
Vyana, 27 may, AZƏRTAC
Azərbaycan-Ermənistan sərhədinin delimitasiyası ilə bağlı Ermənistanın isterik davranışları anlaşılan deyil. Azərbaycan hərbçiləri Ermənistan ərazisində deyil, beynəlxalq səviyyədə tanınmış sərhədlərimiz daxilində mövqe tuturlar. Delimitasiya ilə bağlı vəziyyəti gərginləşdirmək cəhdləri Ermənistandakı daxili siyasi proseslərdəki qeyri-sabitlikdən irəli gəlir. Bütün bunların seçkiqabağı dövrdə baş verməsi də bunu təsdiqləyir.
Bu fikirləri AZƏRTAC-a açıqlamasında xarici işlər naziri Ceyhun Bayramov Azərbaycan-Ermənistan dövlət sərhədində son dövrlərdə baş verən erməni təxribatlarını şərh edərkən bildirib. Qeyd edilib ki, Ermənistanda bu vəziyyətdən istifadə edən siyasi qüvvələr seçkiqabağı kampaniyada rəqiblərinə zərbə vurmağa çalışırlar: “Ümumiyyətlə, biz bu tendensiyanı çox zərərli hesab edirik, onu üçtərəfli Bəyanatın icrasına və bölgədəki sabitliyə zərbə kimi qiymətləndiririk”, - deyə nazir vurğulayıb.
Ceyhun Bayramov bildirib ki, bir sıra hallarda Ermənistanın təbliğatı çox təhrikçi bir formada məlumatları təqdim edir və qarayaxma kampaniyası ilə məşğuldur. Təbii ki, Vyanadakı bütün görüşlərdə bizim bu və ya digər məsələlərlə bağlı Azərbaycanın mövqeyini izah edən arqumentləri gətirmək və faktlara istinad etmək imkanımız oldu.
Diqqətə çatdırdıq ki, artıq regionda yeni reallıqlar yaranıb. 44 günlük Vətən müharibəsində şanlı Azərbaycan Ordusunun Müzəffər Ali Baş Komandanın rəhbərliyi ilə əldə etdiyi Qələbə tamamilə yeni reallıqları ortaya qoyub. Bu reallıq ondan ibarətdir ki, Azərbaycanın dövlət sərhədi bərpa olunub. Azərbaycan sərhədçiləri həmin mövqelərə çıxırlar və bu, Ermənistanda tamamilə qeyri-adekvat bir reaksiya doğurur. Azərbaycan tərəfi öz ərazilərində, beynəlxalq sərhədlərində mövqelər tutur. Eyni zamanda, Azərbaycan tərəfi onu da qeyd edir ki, qarşı tərəfin hər hansı bir iddiası varsa, hər hansı bir müəyyən edilməyən və yaxud da ki, sual doğuran məqamlar varsa, beynəlxalq səviyyədə qəbul olunmuş bir həll mexanizmi var. Həll mexanizmi ondan ibarətdir ki, dövlətlər işçi qrupu, lazım olarsa işçi komissiyası yaratmalıdırlar, mütəxəssislər cəlb edilməlidirlər və burada hər hansı bir siyasi isteriya formasında deyil, normal praqmatik formada sərhədlərin delimitasiyası aparılmalıdır. Bundan sonra hər bir tərəf həmin beynəlxalq sərhədlərə hörmətlə yanaşmalıdır. Azərbaycan tərəfi bunu dəfələrlə bəyan edib. Bildirib ki, bu məsələlər ölkələr arasında bir-birinin suverenliyini, ərazi bütövlüyünü və beynəlxalq sərhədlərin toxunulmazlığı prinsipləri əsasında həll olunmalıdır. Azərbaycan bunun tərəfdarıdır. Ermənistan isə qeyri-adekvat, tamamilə məsələnin mahiyyətinə uyğun olmayan addımlar atmaqla gərginlik yaratmağa çalışır.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
