Ağdam, 11 iyun, Tahir Ağaməmmədov, AZƏRTAC

Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin göstərişinə əsasən işğaldan azad edilmiş ərazilərdə dislokasiya olunan bölmələrin hərtərəfli təminatının, sosial-məişət şəraitinin və qoşun xidmətinin təşkili ilə bağlı təxirəsalınmaz tədbirlər davam etdirilir.

AZƏRTAC-ın bölgə müxbiri xəbər verir ki, şəxsi heyətin xidməti və döyüş fəaliyyətinin təşkili, eləcə də məişət şəraitinin təmin edilməsi məqsədilə Ağdam rayonu ərazisində müasir avadanlıqla təchiz olunmuş müxtəlif təyinatlı qurğulardan ibarət modul tipli hərbi hissələrlə tanışlıq üçün iyunun 11-də mediatur keçirilib.

Tədbir çərçivəsində jurnalistlər modul tipli hərbi hissələrdə yaradılan yataqxanalar, tibb məntəqəsi, yeməkxana, mətbəx, silah otağı və hamam-sanitar qovşağı ilə yaxından tanış olublar. Məlumat verilib ki, modul tipli komplekslərdəki xidməti otaqlar kondisionerlər, mebellər, müasir tipli sanitar qovşaqları, yataq ləvazimatları, mətbəx avadanlıqları və generatorlarla təchiz edilib. Yeni alınan səyyar avadanlıqlar sayəsində şəxsi heyət daim isti yemək və məişət xidmətləri ilə təmin olunur.

Birinci Ordu Korpusunun komandiri, general-mayor Hikmət Həsənov jurnalistlərə açıqlamasında bildirib ki, 44 günlük Vətən müharibəsində tarix yazan qəhrəman Azərbaycan əsgərinin azad olunmuş ərazilərdə şəraitinin yaxşılaşdırılması istiqamətində mühüm tədbirlər görülür. Bu işlər dövlətin Azərbaycan əsgərinə diqqət və qayğısının nümunəsidir. Prezident, Ali Baş Komandanın rəhbərliyi və Azərbaycan Ordusunun döyüş meydanında qəhrəmanlığı sayəsində hərbçilərimiz böyük zəfərlərə imza atdı, Ermənistan kapitulyasiya aktını imzalamağa məcbur oldu. Zəfərdən sonra qoşunların işğaldan azad edilmiş ərazilərdə dislokasiyası zərurəti yaranıb. Bununla əlaqədar bazalar, yaşayış kompleksləri salınıb. Bu istiqamətdə quruculuq işləri görülür. Yaşayış kompleksləri şəxsi heyətin istirahəti, asudə vaxtının təşkili, tibbi təminatı, maddi-texniki təminatının bütün növlərini əhatə edir. Bununla da Azərbaycan əsgərinin daha effektli, mükəmməl döyüş hazırlığı ilə məşğul olması təmin edilir. Burada əsgərlərimiz üçün bütün şərait yaradılıb. Bu, bizim Zəfərin, Qələbənin təzahürüdür. Bu qələbənin qazanılması zamanı şəhid olan qardaşlarımıza Allahdan rəhmət, qazilərimizə şəfa diləyirik.

Müdafiə Nazirliyinin mətbuat xidmətinin mətbuat katibi polkovnik-leytenant Anar Eyvazov qeyd edib ki, işğaldan azad edilmiş ərazilərdə müasir avadanlıqlarla təchiz olunmuş müxtəlif təyinatlı qurğulardan ibarət 60-dək modul tipli yerləşmə məntəqəsi hərbi qulluqçulara təhvil verilib. Bununla da bu hərbi hissələrdə xidmət edən hərbi qulluqçuların məişət şəraiti daha da yaxşılaşdırılıb, onların döyüş və xidməti fəaliyyətləri üçün daha yaxşı şərait yaradılıb. Ali Baş Komandanın göstərişinə uyğun olaraq azad olunmuş digər ərazilərimizdə yeni hərbi hissələrin tikintisi planlı şəkildə davam etdirilir.

Media nümayəndələri zabit və əsgərlərlə birgə nahar ediblər. Əsgər Əli İsmayılov AZƏRTAC-ın bölgə müxbiri ilə söhbətində deyib: “İşğaldan azad olunmuş ərazilərdə xidmət etdiyim üçün fəxr edirəm. Qalib Azərbaycan Ordusunun əsgəri olduğum üçün qürurluyam. Valideynlərimə demək istəyirəm ki, məndən nigaran qalmasınlar. Hərbi hissələrdə əsgərlərin məişət və xidmət şəraiti yüksək səviyyədədir. Ailəmə, dostlarıma salam göndərirəm”.