Ağstafa, 16 oktyabr, Ruslan Novruzoğlu, AZƏRTAC

Qabaqdan qış fəsli gəlir. Bölgələrdə xüsusən meyvə və tərəvəz yığımının davam etdiyi dövrdə müxtəlif cür mürəbbə və meyvə şirələri hazırlanır, qışa azuqə toplanır.

AZƏRTAC xəbər verir ki, hazırda Ağstafanın Dağkəsəmən kəndində heyva bağlarında məhsul yığımı davam edir. Evlərdə bu meyvənin mürəbbəsi bişirilir. Kənd sakini Salatın Abdullayeva deyir ki, hər evdə olduğu kimi, o da qışa hazırlıq görür: “İndi heyva mürəbbəsi bişirmək üçün yaxşı zamandır. Heyva mürəbbəsi bişirərkən su və şəkərdən başqa, zövqə uyğun olaraq mixək və ya qoz ləpəsi də əlavə edirik. Hazırkı soyuq dövrdə bu mürəbbə bronxlara və ürəyə çox xeyirlidir. Heyva mürəbbəsi hazır olduqdan sonra onu qablara yığıb saxlayırıq”.

İlin hər fəslində mürəbbə yeyilə bilər. Ondan bəzi şirniyyatların hazırlanmasında da istifadə edilir. Mürəbbə iki cür hazırlanır: ya meyvələr şəkərə qatılıb bir gecə saxlanılaraq qaynadılır, ya da qaynayan şərbətə atılaraq bişirilir. Qaynayıb bişən mürəbbə bankalara yığılaraq ağzı qapaqla bərk-bərk bağlanır.

Mürəbbəni bir çox meyvə və tərəvəzdən hazırlamaq olur. Kənd sakini Aidə Qocayeva deyir ki, mürəbbə bişirməyi hələ uşaq yaşlarından öyrənib. O, çox vaxt meyvəni elə həyətindən dərib bişirir: “Bizim bölgədə heyva ağacı çoxdur. Ona görə də qış üçün mürəbbə tədarükünü əsasən bu meyvədən görürük. Bazardan almaqdansa özümüz bişiririk, belə ucuz başa gəlir. Heyva mürəbbəsinin insan orqanizminə xeyri çoxdur. Əvvəlcə suda bişirilməlidir. Sonra çəkisi nə qədərdirsə, o qədər də şəkər tozu əlavə edib təkrar bişirmək lazımdır”.

Evdə xanımlar mürəbbə tədarükünü bəzən tək, bəzən qonum-qonşularla birgə görürlər. Köməkli iş isə daha tez başa gəlir. Soyuq qışa ərzaq tədarükünün görülməsi xalqımıza məxsus məişət adət-ənənələrindən birinə çevrilib. Xalqımız “qışdan qorxma ki, üzü yazadır, payızdan qorx ki, üzü qışadır” - deyimini əsas tutaraq məişət işlərini ona uyğun qurub.

Kənd sakinlərinin sözlərinə görə, hər bir evdə ailənin tərkibinə uyğun olaraq azı 60-100 kiloqram mürəbbə, meyvə şirəsi, tutma və digər konservlər bağlanıb qış üçün saxlanır.

Çoxlarımız pandemiyanın yayıldığı bu dövrdə xüsusilə soyuqlayarkən dərmanlara üz tutsaq da, mürəbbələrdən də istifadə edirik. Elə nənələrimiz də soyuqdəymə zamanı mürəbbələrin xeyrindən danışırlar. Onlar heyva və zoğal mürəbbəsinin soyuqdəyməyə, zəncəfil mürəbbəsinin bəlğəmə qarşı faydalı olduğunu deyirlər. Badamdan hazırlanın mürəbbə isə öskürəyə qarşı çox yaxşı təsir göstərir.