Bu kəndlərdə həyətlər arasında hasar yoxdur - REPORTAJ VİDEO
Tovuz, 29 iyul, Ruslan Novruzoğlu, AZƏRTAC
Tovuzun dağlıq ərazilərindəki yaşayış məntəqələri, xüsusən də Əsrik dərəsi boyunca yerləşən kəndlər ölkəmizin ən gözəl guşələrindən sayılır. Bu kəndlərin diqqətçəkən xüsusiyyətlərdən biri də insanlarının çox mehriban, gülərüz və qonaqpərvər olmasıdır. Elə bu səbəbdən də dağ kəndlərində adət etdiyimizdən fərqli olaraq, qonşu evlərin, həyətlərin arasında hasar, dəmir darvaza, yaxud tor məftillər çəkilmir. Onları adətən meyvə ağacları, təxmini bir işarə əvəz edir. Kənd sakinləri isə bunun dağ kəndinin insanları arasında olan səmimiyyət, inam və mehribanlıqdan irəli gəldiyini deyirlər.
AZƏRTAC xəbər verir ki, Hacılar kəndinin də daxil olduğu, Çatax inzibati ərazi vahidliyi 9 kəndi əhatə edir. Rayon mərkəzindən 35-40 kilometr məsafədə yerləşən bu ərazinin sakinlərinin məşğuliyyəti əsasən əkinçilik və heyvandarlıqdır. Bu ərazi respublikamızın nadir və səfalı yerlərindəndir. Əhalisi də olduqca deyib-gülən, mehriban və qonaqpərvər insanlardır. Onların demək olar hamısı bir-birini tanıyırlar. Bu səbəbdən də heç kəs qonşusu ilə araya hasar çəkməyi, sərhəd qoymağı lazım bilmir.
“Burada yaşayan qonşuların bir-birinə o qədər inamı var ki, hər şeyi bir-birinə etibar edirlər, ona görə də hasara ehtiyac yoxdur. Hətta harasa gedəndə bir-birinə evin açarını verirlər. Ola bilsin ki, ev sahibi 3-5 gün evə gəlməsin. Qonşu onun evindəki heyvanlara qulluq edir, həyət-bacasına göz-qulaq olur”, - deyə kənd sakini Məhəmməd Bayramov bildirib.
Hasarlar olmadığı üçün heyvanlar, ev quşları qonşuların bir-birinin təsərrüfatına keçdikdə də problem yaşanmır. Qonşular bu barədə bir-birinə xəbər verirlər. Həyətlərdə qapı olmadığından ev sahibini səsləyərək çağırırlar. Dədə-babadan gələn bu ənənəni ağsaqqallar gənclərə də aşılayır ki, ənənə davam etsin. Hasarsız həyətlərdə toy-şadlıq olanda, həmçinin kədərli günlərdə belə hər kəs bir-birinə köməyə gəlir. “Dağ kəndlərində bir çox yaxşı ənənələr var. Bunlar keçmişdən qalan ənənələrdir. Şəhər yerlərində bunlara o qədər də diqqət yetirilmir, amma kənddə əməl olunur. Bu, mehribanlığın əlamətidir. Evlər arasında təxmini öz sərhədlərimiz var. Amma dəqiqlik üçün hasar və ya başqa nə isə yoxdur. Kiminsə hansısa heyvanı, toyuq-cücəsi itəndə bir-birimizlə soraqlaşırıq”, - digər kənd sakini Atəş Yusifov qeyd edib.
Sakinlərin bəziləri deyir ki, belə yaşam tərzi onlar üçün rahat olduğundan hasar tikməyi düşünmürlər. Bu dağ kəndlərində adət-ənənələr də çoxdur və qədimdir. Ən əsası, hər hansı bir iş görüləndə ağsaqqal sözü vacib sayılır. Hər kəs ağsaqqal xeyir-duası ilə iş görür.
İndi yay fəsli olsa da, həyətlərdə iş bitmir. Kimisi ot çalır, qışa tədarük görür, kimisi də əkin sahəsində tərəvəzini becərir. Yolu bu dağ kəndlərinə düşənlər hasarsız evlərin olduğu Çataq, Hacılar, eləcə də ətrafdakı Pələkli, Böyük Qışlaq, Muncuqlu, Qoşa və digər kəndlərdə də eyni mənzərənin şahidi olurlar. Bu kəndlərin hamısında gözəl şərait, insanların bir-birinə ehtiram göstərmək, etibar etmək kimi xüsusiyyət var. Bu cür mənzərə bu kəndlərə gələn qonaqların da diqqətini çəkir. Ona görə də hər yay buraya istirahətə gələnlərin sayı kifayət qədər olur.
Bölmənin digər xəbərləri
