Ulu Öndərin xatirəsi Çində də anılıb VİDEO
Pekin, 12 dekabr, AZƏRTAC
Azərbaycan xalqının Ümummilli Lideri, görkəmli dövlət xadimi Heydər Əliyevin xatirəsi Azərbaycanın Çin Xalq Respublikasındakı səfirliyində anılıb.
AZƏRTAC xəbər verir ki, əvvəlcə Ulu Öndərin xatirəsi bir dəqiqəlik sükutla yad edilib, səfirlikdəki büstü önünə gül dəstəsi qoyulub.
Çində yaşayan və təhsil alan soydaşlarımızın qatıldıqları tədbirdə çıxış edən səfir Bünyad Hüseynov həyatını qüdrətli Azərbaycan dövlətinin yaradılmasına və inkişafına həsr etmiş görkəmli dövlət xadimi Heydər Əliyevin xalqımız qarşısındakı xidmətlərindən danışıb, onun tarixə müdrik rəhbər, böyük strateq və qlobal düşüncəli siyasi Lider kimi düşdüyünü deyib. Bildirib ki, Heydər Əliyev Azərbaycan xalqını və dövlətini tarixin ağır və sərt sınaqlarından çıxarıb, işıqlı gələcəyin etibarlı bünövrəsini yaradıb.
Səfir Ümummilli Lider Heydər Əliyevin hələ sovet dövründə Azərbaycana rəhbərik etdiyi vaxtda respublikanın hərtərəfli inkişafı istiqamətində gördüyü işlərdən danışıb, onun liderlik xüsusiyyətlərinin keçmiş SSRİ rəhbərliyinin diqqətini cəlb etdiyini və böyük siyasi xadimin Sovet İttifaqının rəhbərliyinə dəvət olunduğunu deyib. Qeyd edilib ki, Ulu Öndər istər keçmiş SSRİ-nin rəhbərliyində olduğu, istərsə də vəzifədən uzaqlaşdırıldığı dövrdə ürəyi daim Azərbaycanla döyünüb, xalqımızın ağır günlərində haqq səsimizi dünyaya çatdırıb.
Diplomat Ulu Öndərin Naxçıvanda yaşadığı və çalışdığı dövrün Azərbaycanın dövlətçilik tarixi üçün xüsusi əhəmiyyət daşıdığını, həmin müddətdə Azərbaycan Xalq Cümhuriyyətinin üçrəngli Bayrağının Naxçıvan Muxtar Respublikasının Dövlət Bayrağı kimi qəbul edildiyini xatırladıb.
Diqqətə çatdırılıb ki, xalqın təkidli tələbi ilə 1993-cü ildə - Azərbaycan üçün çox ağır dövrdə hakimiyyətə qayıdan Heydər Əliyev uzaqgörən siyasəti və müdrikliyi sayəsində ölkəni çətin sınaqlardan çıxararaq, inkişaf və tərəqqi yoluna yönləndirməyə nail olub, bu dövrdə ölkədə siyasi sabitlik təmin edilib, nizami ordu quruculuğuna başlanılıb, iqtisadiyyatın inkişafı, əhalinin rifahının yaxşılaşdırılması üçün genişmiqyaslı islahatlar həyata keçirilib, dünyanın qabaqcıl şirkətləri ilə “Əsrin müqaviləsi” imzalanıb. Məhz Ulu Öndərin müdrik siyasəti sayəsində Azərbaycanın müstəqilliyi qorunub saxlanılıb, onun müəllifi olduğu nəhəng enerji layihələri müstəqilliyimizi sarsılmaz və əbədi edib.
Qeyd olunub ki, Ulu Öndərin Azərbaycan xalqı qarşısında ən böyük tarixi xidmətlərindən biri də özünü əvəz edə biləcək siyasi varis yetişdirməsidir. Heydər Əliyev siyasi kursunun layiqli davamçısı, Müzəffər Ali Baş Komandan, Prezident İlham Əliyevin yürütdüyü praqmatik və uzaqgörən siyasəti nəticəsində Azərbaycanın ərazi bütövlüyü və suverenliyi bərpa olunmaqla yanaşı, ölkəmiz regionun sürətlə inkişaf edən, güclü və nüfuzlu dövlətinə çevrilib.
Səfir B.Hüseynov görkəmli dövlət xadimi Heydər Əliyevin Azərbaycan-Çin münasibətlərinin inkişafına verdiyi diqqətdən danışıb, Ulu Öndərin 1994-cü ildə Çinə rəsmi səfərinin iki ölkə əlaqələrində xüsusi rol oynadığını deyib.
Pekin Xarici Dillər Universitetinin Azərbaycan dili kafedrasının müdiri filologiya üzrə fəlsəfə doktoru Aqşin Əliyev, Azərbaycan Televiziyasının Çin və Şərqi Asiya ölkələri üzrə xüsusi müxbiri Afaq Cəfərova Ulu Öndər Heydər Əliyevin dövlətimizin müstəqilliyinin qorunmasında, ölkənin hərtərəfli inkişafı istiqamətində gördüyü nəhəng işlərdən danışıblar. Qeyd olunub ki, 30 ilə yaxın işğal altında olan torpaqlarımızın 2020-ci ilin payızında Vətən müharibəsi nəticəsində azad edilməsi, 2023-cü ilin sentyabrındakı lokal xarakterli antiterror tədbirləri sayəsində suverenliyimizin bərpası dahi Lider Heydər Əliyevin vəsiyyətinin, arzusunun yerinə yetirilməsi idi. Təkcə Azərbaycanda deyil, dünyanın müxtəlif ölkələrində yaşayan həmvətənlərimiz üçün bu Zəfər fəxarət hissi yaradıb.
Sonda Ulu Öndərin həyatına dair film nümayiş olunub, ehsan süfrəsi açılıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
