Ağstafa, 16 yanvar, Ruslan Novruzoğlu, AZƏRTAC

Doqquz yaşlı Ümid Həsənov Ağstafanın Qarahəsənli kəndində yaşayır. Bəhlul Məmmədov adına Qarahəsənli kənd ümumi orta məktəbinin III sinfində oxuyan bu balaca bacarığı və istedadı ilə digər sinif yoldaşlarından, həmyaşıdlarından fərqlənir.

AZƏRTAC xəbər verir ki, Ümid III sinifdə oxumasına baxmayaraq, coğrafiya elmi haqqında artıq xeyli məlumata sahibdir. Halbuki coğrafiya fənni hələ Ümidin oxuduğu sinifdə 3 ildən sonra tədris olunacaq.

Valideynləri, qohumları deyirlər ki, Ümid coğrafiya elmi ilə altı yaşından maraqlanmağa başlayıb. Qitələr, ölkələr, onların paytaxtları, şəhərlər, okeanlar, Azərbaycanın coğrafiyası haqda geniş biliyə malikdir.

Ölkələrin bayraqlarını əzbər bilir, boş vaxtını internetdən coğrafiya haqqında məlumatlar əldə etməyə çalışır. Ümid demək olar ki, coğrafiya fənnindən il ərzində tədris olunacaq bütün dərsləri indidən bilir. “Mən bütün dərslərimi bilirəm. Kitablarımız verilən gündən hamısını oxumuşam. Mənə dərslər çox asan gəlir. Digər fənlərdən tarix, riyaziyyat, Azərbaycan dili ilə də maraqlanıram. Böyüyəndə isə İspaniya, İtaliya kimi Avropa ölkələrində səfir çalışmaq, orada Azərbaycanı təmsil etmək istəyirəm”, - deyə balaca bildirib. 

Müəllimi Sevinc Abdıyeva da Ümidin biliyi ilə yaşıdlarından fərqləndiyini söyləyir: “Ümid başqa uşaqlara bənzəmir. Yəni, böyük istedadı var. Dərs keçəndə mövzu üzrə yuxarı siniflərə aid elə ətraflı məlumatlar verir ki, hətta mən təəccüb edirəm. Həqiqətən də öz yaşına görə dolğun cavablar verir. Halbuki Ümid ibtidai sinif şagirdidir, III sinifdə oxuyur. Dəfələrlə özündən soruşmuşam ki, “ay Ümid, bunu haradan bilirsən?”. Deyir ki, “yutubdan baxıb öyrənmişəm”.

Ailədə üç uşaqdan ən kiçiyi olan Ümid artıq qısa müddətdə onu tanıyanları təccübləndirməyi bacarıb. “Bir gün Ümidə Xəzəryanı ölkələr haqqında suallar verirdim. Dəqiq cavablar verdi. Məəttəl qaldım. Sonradan gördüm ki, nəinki Xəzəryanı ölkələri, dünyanı, qitələri, okeanları tanıyır, dövlətlərin ərazisini bilir. O, dərsdən sonra vaxtını kompüterdə biliklərini artırmağa sərf edir”, - deyə qohumu Süleyman Babayev bildirib.

Ümid qərb bölgəsinin ucqar bir kəndində, paytaxtdan 470 kilometrdən çox məsafədə yaşasa da, qarşısına qoyduğu məqsədə çatmaq üçün hələ uzun yol keçəcək. İnanırıq ki, o, bütün ümidləri doğruldub, elə arzuladığı kimi gələcəkdə savadlı və bacarıqlı diplomat olacaq.