Amerikalı general: ABŞ ilə Azərbaycan sülhü və stabilliyi gücləndirmək naminə birgə səy göstərir VİDEO
Vaşinqton, 30 may, AZƏRTAC
Azərbaycanın ABŞ-dakı səfirliyinin təşkilatçılığı ilə Vaşinqtonda 28 May - Müstəqillik Gününə və 26 İyun - Silahlı Qüvvələr Gününə həsr olunmuş qəbul keçirilib.
AZƏRTAC xəbər verir ki, qəbulda əvvəlcə hər iki ölkənin Dövlət himnləri səsləndirilib.
Daha sonra çıxış edən səfir Xəzər İbrahim ABŞ-la Azərbaycan arasında əməkdaşlığın dərin tarixə malik olduğunu deyib. Onun sözlərinə görə, iki ölkə arasında hər zaman mükəmməl əlaqələr mövcud olub. Səfir Müstəqillik Günü ilə bağlı ABŞ Prezidenti Cozef Baydenin Azərbaycan Prezidenti İlham Əliyevə məktub ünvanladığını qeyd edərək bildirib ki, məktubda 30 ildən artıq tarixə malik diplomatik münasibətlər dövründə ABŞ ilə Azərbaycanın qarşılıqlı maraq kəsb edən güclü tərəfdaşlıq əlaqələri qurduğu qeyd edilib.
Azərbaycanın bu il COP29-a ev sahibliyini qeyd edən diplomat Azərbaycan Prezidentinin kiçik ada dövlətlərinə yardımla bağlı beynəlxalq ictimaiyyətə müraciət etdiyini deyib. Onun sözlərinə görə, Azərbaycan iqlimlə bağlı yerli gündəlik üzərində də işləyir və Xəzər dənizinin külək enerjisinin Avropa bazarına çıxarılması ilə bağlı meqa layihələr həyata keçirilir.
Səfir bildirib ki, Azərbaycan öz ərazi bütövlüyünü və suverenliyini bərpa etdikdən sonra regionda sülh üçün əla fürsət yaranıb.
Daha sonra Azərbaycanın ABŞ-dakı hərbi attaşesi Rüstəm Gözəlov Azərbaycan Xalq Cümhuriyyəti qurulan zaman onun qarşıya qoyduğu əsas məqsədlərdən birinin də ordu quruculuğu olduğunu deyib. Onun sözlərinə görə, iyunun 26-da Azərbaycan Xalq Cümhuriyyəti ilk ordusunu yaradıb və bu, milli hərbi birləşmədə, milli dövlətçiliyin müdafiəsində, sərhədlərin qorunmasında və yeni qurulmuş respublikanın təhlükəsizliyinin təmin edilməsində çox vacib rol oynayıb. Hərbi attaşe əlavə edib ki, müstəqilliyini bərpa etdikdən sonra iqtisadi çətinliklə üzləşən Azərbaycan həm də hərbi təcavüzə məruz qalıb. Buna baxmayaraq, Azərbaycan bu sınaqdan ləyaqətlə keçib və respublikanın suverenliyini, ərazi bütovlüyünü bərpa etməyə qadir güclü Silahlı Qüvvələrini formalaşdırıb.
R.Gözəlovun sözlərinə görə, bu gün Azərbaycan Ordusu beynəlxalq sülhə və təhlükəsizliyə töhfə verir.
ABŞ Dövlət katibinin köməkçisinin müavini Coşua Hak 32 il ərzində iki ölkə arasında tərəfdaşlıq əlaqələri qurulduğunu və bu tərəfdaşlığın dostluğa, ortaq maraqlara və qarşılıqlı hörmətə əsaslandığını deyib. O bildirib ki, Azərbaycanla ABŞ bu illər ərzində terrorla, zorakı ekstremizmlə mübarizə sahəsində birlikdə hərəkət edib.
Coşua Hak, həmçinin enerji və qaz layihələrində, təhsil, “yaşıl iqtisadiyyat”a keçid sahələrində əməkdaşlığa toxunub. ABŞ rəsmisinin sözlərinə görə, Dövlət katibi Antoni Blinken bu əlaqələri qurmaq və inkişaf etdirmək, həmçinin Ermənistanla Azərbaycan arasında ədalətli, davamlı sülhə nail olmaq səylərinə şəxsən xüsusi diqqət yetirir. O, ABŞ-ın Azərbaycanın müstəqilliyinə, ərazi bütovlüyünə və suverenliyinə dəstəyini bir daha təsdiqləyib.
Oklahoma Milli Qvardiyasının Briqada generalı Kolbi Vayet 22 il əvvəl Azərbaycanla Oklahoma Milli Qvardiyası arasında tərəfdaşlıq proqramı çərçivəsində əməkdaşlıq əlaqələrinin qurulduğunu qeyd edib. O bildirib ki, təmsil etdiyi ştat hər iki tərəf üçün fayda kəsb edən əlaqələrə sadiqdir. Amerikalı general tərəflərin sülhü və stabilliyi gücləndirmək naminə birgə səy göstərdiyini diqqətə çatdırıb.
Çıxışlardan sonra ABŞ-ın Vaşinqton şəhərinin meri Muriel Bauzer tərəfindən 28 May - Azərbaycanın Müstəqillik Günü münasibətilə imzalanmış bəyannamə oxunub.
Məlahət Nəcəfova
AZƏRTAC-ın xüsusi müxbiri
Vaşinqton
Bölmənin digər xəbərləri
